Na avea faamavaega a le autalavou ma Luama i totonu o le falesa, ua pei ai ua le fia vave o ese isi i fafo mai le falesa. Aemaise lava foi loomatutua o le aulotu a Talivai, le au ula lava lenei o loo latou faia uma tala o fanau talavou a le aulotu, lea e le sepu ai se gaoioi a se isi.
E oo lava i le tau tutu o se teine ma se tama e talanoa i lalo ifo o le faapaologa o le falesa i se Aso Sa pe a tuua se lotu, e le umi lava ae amata foi ona feula solo e le matagi ni tala faapea o lena toalua o loo uo, ma amata ai loa foi ona fai suegatala.
Le pogai tonu foi lea ua le vave ai ona o loomatutua i fafo, ona ua matua faata lelei mai meavaai i nai tama nei e gasolo mai e fia faamavae ia Luama, ae ua matua vaatutu lelei mai i ai meapueata a tina o le aulotu, sei vaai poo ai lea o le a soona tafe malosi lona faua i le fia sogi umi i le afafine o le faifeau.
E oo foi i nai tamaiti, ua tele le fia talanoa umi ma le fia uu umi i le lima o le tamaitai malaga, ae paga lea, ua le lelei ni taga e fai, i nei loomatutua e saofafai lava ma tilotilo atu. Fua foi lena, na tau tu umi loa ona tu si tama ta okeni ma talanoa atu ia Luama, pei o le ā le alaga ane o le loomatua o Seila mai le isi tulimanu, ‘se ua lava lena faatofa ua fia alu le teine e ‘ai. Na o le faatalofa lava ma le faatofa ma mei ese loa o lea e fia faasolo atu isi.’
Ua faigata ona tele nisi tala a si tama o Lotuma, aua e tiga lava ona taumafai e auala le faalogo atu i fati nei a loomatutua, ae faigata tele ona o loo pisapisao ane pea ma amata ai ona tau matamumuli nai tama.
Talofa e, i si tama o Lotuma, e leai sana galuega faaofisa o galue ai, na o lana galuega i se tasi o pamupenisini i Apia lea e nofo ai i lona auntie ma usu i ai, ae faatoa alu atu i tua i Aso Faraile aua aogapese a le aufaipese, ona toe usu mai foi lea i Aso Gafua. Ae lei misi ia Lotuma le fia fai o sana mealofa mo le afafine o le latou faafeagaiga, lea ua leva ona moomoo ma folofolo faua i le fia fai uo i ai, ae na te iloa lava e le taitai maua i ai sona avanoa.
O lea lava na te manatua ai le tala a le isi ana tama na fai ane ia te ia ina ua faailoa i ai ona lagona fia uo ia Luama, fai mai lana tama lea, “sili ai pe a tuu alii man. E lata mai le va o le lagi ma le lalolagi, i mamao e te ono savalia faatoa tau latalata sou avanoa i le afafine o le faifeau.”
