A o fai atu pea upu faamafanafana a le tama o le galuega i lona faletua lea e taoto pea ma tagi, ae i le matau a Talivai, e foliga e tuga atu se mea lea e mamafa i le mafaufau o lona toalua, fua i le masusu pea.
Ua malosi ane lava le masalosalo o Talivai i le tagi a lona faletua, ona fesili loa lea, “Tina, e iai ea se mea patino o e faanoanoa ai i si au tama? E pei ona ou fai atu, e tatau o taua e faalototele i le teine. A vaai mai nei Luama ua amata ona ta faanoanoa, e iu ina taunuu i Niu Sila ae toe faalogo atu ua mai e toe fia sau.”
E lei uma lelei atu upu nei a Talivai, ae aapa mai lona toalua ma taumafai e toe toso atu le lima o le toeaina e faataoto i le moega. E lei taoto Talivai, ae ua na ona toe see ifo e taoto ma faataupupula atu i lona toalua lea ua amata ona tautala mai. “Tama, o loo ou mafatia i si a ta tama.
Sao lelei oe e le tatau ona ta soona faaaliali lo ta faanoanoa. I le taimi e tasi, e tele ma isi o ta popolega,” ua toe motu le tala a le fafine ona o loo taumafai lava e faatoatoa lona leo lea ua amata ona tete a o tautala.
“O e manatua e toalua alii nei sa faananau mai ia Luama, a ea?” ua luelue atu lava le ulu o si toeaina o Talivai, ae o loo peiseai e faaletonu ona foliga poo fea tonu le itu lea e agai i ai faamatalaga a le faletua.
“Tamā, ou te manao a o lei mamulu ese atu Luama mai o ta lima, sei toe aumai tasi lava si a ta tama sei o tatou momoe faatasi, ma sei o ta toe talanoa patino atu lava taua i ai, ma ia fai mai sana tala ia faamautinoa o loo tumau pea lona mamalu faateinemuli mai nei taimi uma sa nofo ese atu ai ma taua.”
Ua toe saofai ae nei le toeaina o Talivai, ua faasilasila lava lana pupula. Ma ua na o le punou lava o si toeaina e lei vave faia sana tala. “Tina, aisea ua toe mamafa ai i lou mafaufau lena mataupu, ae semanu sa fai lelei lava foi tatou tala ma Luama ma ia tautino mai lona tulaga mama o loo iai pea? Talanoa mai Tina, e iai se mea ua e iloa?” Ua alofa lava le toeaina i si ona toalua, na ia tago atu ai e pei e seluselu i lona lima le lauulu o le fafine.
Ua faamatala nei e Puna le talanoaga a le au tamaitai lea sa ia tau maua atu i totonu o le latou potu, peitai e lei matua maua atoatoa atu tala uma, pau le mea lea na ia mautinoa mai, o Luama lea sa agai i ai tausuaga ma fesili a Aolele, pei e foliga e iai se mea na tupu ia Luama ma le alii aoao o Pula i se mea na fai i lona fale. Ua atili ai le manumi o le muaulu o Talivai i le tala lea ua amata ona faalogologo atu i ai o faamatala mai e Lagi.
“E a ea? se ou te le talitonu e faapena lo‘u afafine. E le faaseegofieina faapena lou afafine e se tagata. Ae ua lelei, sei toe foi si loomatua o Filo ma lana tama i Apia, ona oo lea nanei aami Luama e sau tatou toe talanoa.
Ae ua lava ia lou faamatagitagi, sei fai lelei mai se tala a le ta tama ia taua, ona fua lea i ai o o ta faalogona i lena taimi. I sese atu ni mafaufauga i lenei taimi ma soona ese ai nisi manatu i si ou afafine, ae mulimuli ane e leai lava se mea na tupu.”
Ua leai lava se isi toe tala a le fafine o Puna, ua na o le taotooto lava ma mafaufau, ae ua toe taoto ifo si toeaina o Talivai ma tapilipili pea lona ili. Na iu ina toe momoe le ulugalii i lena po, ae na alapo lava le fafine o Puna ma alu ane i fafo e tapena ma fafagu le aumalaga lea e toe foi mai i Apia, aua sa manao le loomatua o Filo e toe lolotu mai i Apia i lana ekalesia leaga e iai a latou mea faatina o loo fuafua e fai pe a uma le lotu.
Na muamua lava tuitui le fafine o Puna i le potu o loo momoe uma ai Luama, Aolele ma Pina. Ma e lei leva lava ona tuitui Puna ae matala mai loa le faitotoa, ma o si ana pele lava foi o Luama lea na tatala maia.
Ua taumafai lava le faletua e nana ona foliga popole o loo iai, ona o lea ua uma ona fai le la tala ma le toeaina, sei o ese atu tagata ona talanoa lea na o latou. “Fafagu atu outou e vave feala i luga e tapena mea, leaga e vave ulu Aolele ma le loomatua ia maua atu le la lotu o le taeao.”
Na uma lava upu nei a Puna ma vave ona toe liliu ese mai ona mata i lana tama lea o loo tu pea ma tilotilo mai i lona tina. E tau amata ona savali ese le faletua mai le faitotoa o le potu o lana tama, ae tago mai le teine ma toe taofi atu le tauau o lona tina, ma sogi mai i ai i le tauau.
Ua toe timuto ifo foi loimata o le faletua ma faliu atu loa fusi mai si ana tama ma fetagisi tutu ai lava i le faitotoa. “Mama, aua e te popole, ou te le manao e alu ae iloa o loo e faanoanoa. E mafai lava ona ou toe nofo pe a lua mananao ou te nofo.”
O upu nei a le teineititi ua atili ai ona maligi loimata o si ona tina, ae leai lava se upu o faia. Ua na o le tu lava ma fusi lana tama, ma pe a ma se minute o fusi pea e le fafine lana tama, ona toe faamamulu loa lea, “Leai, sauni lau malaga e te alu e fai ia lelei lau aoga.
E le umi lava foi ona ma masani lea i lou le toe iai iinei i le tele o taimi. Ae alu e fafagu Aolele ma Pina. Ona e sau lea e fai se ti mo tatou a o lei toe foi si loomatua i Apia.”
Na uma lava tala a Puna ma toe savali ese mai e agai atu i lo la potu, ae ua tutu lava le teineititi ma tilotilo mai i le savali ese a lona tina. O loo faanoanoa lona loto aua ua toe o le aso ona faamavae loa lea i ona matua ma alu ese atu.
Ua popole foi le teine i foliga na ia vaaia i lona tina, ae sa taumafai lava e lototele. Na fafagu e Luama le isi vaega o le latou falemoe, ona agai ane loa lea o ia i fafo ma amata tapena le malu taeao a le aiga. E lei umi ae faatasi ane loa i ai Aolele ma Pina.
Na matua ofo le toalua lea i le oo atu i le umukuka, ua toe lava ina lau ane meaai i le laulau, ae ua uma lelei ona tapena e Luama le kukaina o taumafa. Na toe talitalie le alii faifeau ma si ona aiga a o alo i le latou malu taeao, ona tapena loa lea o le auala o Aolele ma si ona tina.
Na tagi aueue le loomatua a o faamavae atu ia Luama, aua na fai i ai Talivai, e aua nei popole e toe alu ane i le malae vaalele leaga e tuai le taimi o le vaa, ae mamao ma malulu mo ia le toe tau sau mai Apia, ae sili ai ona faamavae loa i lana tama a o lei toe foi i Apia.
Toeitiiti atoa le luasefulu minute o le faamavaega a le loomatua ma lana tama, ua le iloga se vaega o le soifuaga nei e lei oo i ai le tautalaga a Filo a o lenei lava e faatali uma tagata o loo tutu e faaee i le la taavale.
Na uma upu tagi tautala a le loomatua, ae ua amata nei ona ta le faleaitu, ma toe faamanatu ane i si teine o Luama, le tauvaga lea na fai ane a le alii loia ma le alii aoao. Ae fai mai si ata aamu a le loomatua o Filo, “a uma loa au aoga i Niu Sila, ona e foi mai lea ma se tatou alii fomai.”
Ua alu le talie a Pina ma Aolele, tau ata atu ai ma si faletua, ae ua na o le tu o Talivai ma lulu le ulu i le tifaga a le loomatua lea ua fai nei. “Mama, se oso ia i totonu o le taavale. Tuu nisi au fautuaga e tusi i lau tusi lea e ave e lau ai Luama i luga o le vaalele.”
Na mou ese atu loa le taavale a Aolele ma si ona tina, ona toe foi lea o le faifeau ma lona aiga i totonu o le latou fale. Na alu le toeaina e tapena ana mea mo le lotu, faapena foi i le faletua, ae o ane Luama ma Pina e tapena ipu na inu ai le latou ti.
Na manaia lava le lauga a le toeaina o Talivai i lena aso, i lona otootoina le Salamo masani e 23, ua auauai uma e Talivai fuaiupu taitasi o le mataupu ma faamatalatala mai o latou uiga eseese.
O pesega foi a le au faipese ua matua maualuga ai le sauniga paia i lea Aso Sa. Na iloa lava e le ekalesia o le Aso Sa mulimuli lea o le afafine o le latou faifeau, ma e toatele foi tina o le ekalesia na o ane tapena lava i le sauniga ma nai a latou teutusi mo le teine o Luama.
O le tatalo faaiu a le toeaina o Talivai na ia taua ai se tasi o le fanau a le ekalesia o le a malaga ese atu mo aoaoga i isi atunuu, ma na iloa uma lava e le aulotu o si ona afafine lea e faatatau i ai.
O le teine foi o Luama, o se teineitiiti e alofagia lava e le aulotu, ona e leai lava ni ona uiga fia tagata faapea o le afafine o le faifeau. O se teine e uiga tauagafau, ma amio solia, ma e moomoo uma ulugalii e iai a latou fanau tama e tupulaga ma Luama, maimau pe ana fia faauo atu le afafine o le faifeau i se tasi o o latou atalii, aemaise foi e atamai tele le teineitiiti.
Na ona tuua lava o le lotu, ae ua taufai lolofi ane tagata e faamavae ia Luama, aua o le po o le aso lea e sosoo ai, e tuuvaa ese ai loa ma Samoa. E oo foi i talavou tama o le ekalesia, ua leiloga se mea e faatafai solo ane ai, a o tau sema mai se taimi e faamavae ai i le afafine o le faifeau.
O le isi ia, ua tei lava ua susū mata i le faanoanoa, e lei iloa pe na iai se mafutaga mafana ma le teine, sei vagana ai lava mea a le autalavou. E lei misi i le alii ta okeni a le aulotu a Talivai, sona avanoa e faamavae ai ia Luama.
Na ona vaai mai lava o si alii o Lotuma ua tau gaogao autafa o Luama, savali sao mai loa popo le tauau o le teine ma sasau mai le faatalofa. O le pao leotele o le kisi a si tama o Lotuma, na pa ai le taliē a loomatutua ula o le aulotu lea e tutu latalata ane ma talie.
E faia pea
