Ua solo lava le talatalanoa fiafia a le aiga i lea afiafi, ma ua amata foi ona malie pesega a le leitio o loo faagasolo mai, o loo tau faaoso ai lava e le faletua o le faifeau ma le tina o Pina, si loomatua o Filo e fai sana soa e faapisapisao ai lena afiafi.
Ona sosoo ai lea ma le toe sagai ane o le tama o Pina e fia momoli lana faafetai i le tama o le galuega ma lona faletua i le taimi foi na nonofo faatasi ai si a la tama ma le teine o Luama. Na faafetai foi i le loomatua o Filo i lana tausiga alofa faatina i teineiti, aemaise o lea foi ua toe ofo mai si loomatua e fiafia lava pe a mananao pea matua o Pina e avatu le teine lau te nonofo aua na o laua lava le la fale ma si ana tama o Aolele.
Na uma le faafetai a le tama o Pina ona tulai lea o lona tausi ma tuu atu le teutusi ia Talivai ma Puna, o sina seleni e faimeaalofa ai Pina i le malaga a si ana uo o Luama. E $300 le tupe sa fafao i le teutusi, ma na faaaliali ai foi i lea po le meaalofa matagofie o le puletasi elei manaia lava a Luama na sui e le tina o Pina, aua e lelei lava le lima o le tausi i lana taleni.
Ona faamavae ai loa lea o matua o Pina, ae nofo Pina e momoe ma Luama i lo latou fale, aua toe tasi lava le po lea o le a toe faatasi ai lenei uo ma fai a la tala, ona tau mavae loa lea.
O le vaalele a le Air Niu Sila lea e fuafua e alu ese ma Samoa i le po o le Aso Sa a malama le Aso Gafua, lea ua uma ona faamautu ai le avanoa o Luama. Ma ua fai ai nei le tonu a Luama ma Pina, e sau Pina la te momoe i le po lea o le Aso Toonai, ae moe i ona matua i le po o le Aso Sa ma tapena ai lana toe usu i le aoga i le taeao o le Aso Gafua. Sa fia nofo lava si teine o Pina e fia alu i le faaeega o si ana uo, peitai o le vaiaso tonu o loo tapena a latou suega e toe fetuunai ai vasega, lea e le tatau ai ona misi nei faaletonu sana vasega e maua.
Sa momoe foi si loomatua o Filo ma si ana tama o Aolele, ma o le isi mea lena na fiafia ai pea Pina e moe i le fale o le faifeau, aua e toe pau lava lea o se latou po faatasi ma ana teine, ma ailoga foi e momoe i le toe faiga o a latou tala, ma sei toe faamanatu nai afiafi ia sa feoai solo ai ma le la leoleonana o Aolele i a latou valaaulia sa masani ona maua ane i nai sponsors sa iai, aemaise lava i si alii o Pula. Ia e sao lelei lava, aua e toetoe lava ao lena po e leai ma se momoe o le autamaitai ae na o toega mea na fai mai totonu o le potu.
Ua ula faasoloatoa Aolele ma Pina i si teine o Luama i le tauvaga a ana tama lea na fai ane nei ia te ia, ae pe mata e toe mafaufau mai i ai pe a alu i Niu Sila. Ua toe faamanatu uma taimi ia sa o ai a latou evaga i le Kitano, aemaise le aso na o ai i le valaaulia i Vailima i le fale o le auntie o Pula lea na tau
Na alu ai lava tala a le vaega lea na talie, o le manatu o latou ua leai se isi o le fale o toe ala i lea taimi o le afiafi. Peitai na faafuasei ona tiga le laualo o le faletua o le faifeau, ai o le oka faisua na fai, na toe tei ae ai i luga ma savali atu i tua i le faletaele.
O le auala i le faletaele e ui atu ma pasia ai le faitotoa o le potu o Luama lea e iai uma le toatolu lea i lena po. E fetaui lava la le pasia e le fafine o Puna o le potu, ae ia faalogoina loa sina fasi tala faapea a Aolele, ‘ia ae sei fai poo le a tonu le mea na tupu i le taimi lea na lua mou ai ma Pula i luga i lona potu.’
Ua talie le autamaitai ae lei faia lava se tala a Luama, peitai o lea ua tu faagatasi nei lona tina i autafa o le faitotoa, ma ua matua faapupu tetele lava taliga o le faletua, i loa fia iloa lelei poo le a le sao o le tala a Aolele, ae poo ai foi o le toalua lea o Pina ma Luama lea o le a tali, ona ia iloa ai lea o le tagata tonu lea e uiga i ai le tala a Aolele.
Ua faigata i le fafine ona lagona atu se tali maoti, ona o loo ata leotele le isi o le toatolu lea, ma e pao solo mai foi mea i totonu o le potu ona o lea e taaalo solo i totonu ma talie.
Ua lagona e le faletua le tiga malosi mai o lona manava ma ua moomia ai le faaauau o lana savaliga i tua, ae o lea e faananau foi na te fia lagona lelei le fasi tala lea ua tau saua nei i lana faalogo, ae maise o se tala e tau faaletonu ai ona faalogona i lana tama. O le atugaluga o si faletua, aua o lea na te iloa o Pula sa faananau mai ia Luama, lona uiga e fai fai lava o Luama lea na fai i ai le tala a Aolele.
Ua toe agai nei le faletua i le faletaele, ae ua tonu i lona mafaufau o le aso lava e sosoo ai e na te faamasinoina ai lana tama i le mea lea ua tau faalogo atu i ai. Na toe foi le faletua i lo la potu, ma e ao lelei lena po ua le mafai ona toe moe.
Na manatu le faifeau ai e ala ona le moe lona toalua ona e le o lelei lana faalogo i lona laualo, peitai e ese le mea lea ua mamafa nei i le mafaufau o le fafine, ua popole nei Puna nei mea ane lana tama lenei o le a tuu atu e alu i Niu Sila, ae ua faaletonu se tulaga o iai.
O le faalogo a Talivai i lena po, e pei e le o oi lona faletua i le tiga o le manava, ae pei se tagata o loo iai se mea o mamafa i lona mafaufau, aua ua silia ma le faasefulu o feliuliuai solo le taoto a le tina. Ona tau lea o le manatu o si toeaina, e foliga ua amata lava ona faanoanoa si ona toalua aua o si a la pele e toatasi lenei o le a alu ese atu. Na iu lava ina toe nofo tata ae i luga Talivai ma aapa atu i lona moli faitau tusi o loo i le laulau i autafa o le la moega ma ki loa. “Tina, o a mai oe, o tiga lava lou manava?”
E lei tali le fafine ae o loo u mai lona tautafa i lona toalua. “Tina, e te manao e ave oe i le falemai?” O le alofa o si fafine i si toeaina lenei ua toe ala atu ma lona popole atu ia te ia, o lea na toe fuli ane ai ma taoto faasaga mai pea i lona toalua. “Leai, lea ua tau feololo lou manava.
Ai ua ova foi lou fiafia i le oka faisua anapo, ae aua e te popole e le manaomia ona ta o i le falemai.” E lei toe vave faia atu se tala a le toeaina, ae ua na o le nofonofo lava ma tapilipili lona ili ma tilotilo solo i totonu o le la potu, ma toe tilotilo mai i si ona toalua lea e taoto.
“E a, ua amata ona e misia si au tama o le a alu. O lea foi ou te matua misia lava si ou afafine, ae ou te le manao e vaai mai le teine ua ta faanoanoa leaga i alu ae ua faanoanoa foi, ma avea ma itu e le lelei ai le amataga o lana aoga i le popole mai ia taua.”
Na tau loa e le toeaina lona afafine, e lei toe mafai e le fafine o Puna ona taofiofi ona loimata, ae ua pei o le timuto le palasi ifo. O ina lava na iloa ai e le toeaina o Talivai, o le la tama tonu lea ua mafua ai le faaletonu o le tina o le galuega. “Nofo maia i luga e fai se ta tala. Sei oo taeao e o Aolele ma lona tina ma alu foi si teine o Pina, ona aumai lea o Luama sei tatou toe momoe tasi ma si a ta pele.”
O tala nei a le toeaina ua atili ai ona tagi le fafine, e pei ua tutui ai lona fatu, ona o le matau ina nei avatu nei pelega ma nei auauga, ae ua oona se tui o le a ono tui ai laua e le la tama i se mea ua tupu i lona olaga faateinemuli. E lei faia lava se tala a le fafine, o loo taoto pea ma tagi masusu.
Ua avea foi ma itu ua amata ai ona susu atu mata o si toeaina o Talivai, ae o loo taumafai lava e faamalosi i lona toalua. “Se aua e te loto vaivai nei avea foi ma faatupu mai ia te oe. E moni lava o le a alu ese atu Luama, ae mafai lava ona fai ma ta o i ai e asi. Lea e tele lava lo ta alofa mai si aulotu, e mafai ona totogi ai ta pasese pe totogi ai foi le pasese o Luama e fai ma tuua mai ai.”
Ua tau faanoanoa le toeaina, ona e tiga le tele atu o ana tala faamafanafana i lona toalua, ae foliga o loo atili ai ona timuto loimata o le faletua.
E faia pea
