“O le a oo mai se taimi ona tatou mavae lea, ma e iai lo ma talitonuga ma lou tina, ae tainane i latou uma sa galulue i soo se auala e oo atu ai se fesoasoani ia te oe, ae iai le talitonuga, ua lava taoso lau malaga, i le tele o upu ma timaiga alofa ua faatumu ai lau ato, ina ia lava tapena oe mo soo se luitau o le olaga nei, e te lua fetaiai a o e aumau ai na o oe i lena atunuu ese.
Tau ina ia tagitagi pea i ou taliga upu faamanatu a ou matua ia te oe i aso uma, ‘O le poto o le meaalofa foaifua mai le Atua, a o le ola matau ma le usitai faamaoni, o le mea lena a le tagata e fai ina ia malie ai le finagalo o le Atua ma foai mai i ai lana poto.’”
Ua tau lagona le tete o le leo o le faifeau ina ua amata ona peiseai ua tautala latalata i lona afafine, ae sa toe lototele lava si toeaina ma faauma ana upu faamafanafana. Na uma upu apoapoai a le tama o le galuega, ona faasolosolo uma lava lea o tautalaga a le tina matua ia Filo, o le tama o Pina, ae faaiu i upu a si faletua o le faifeau, le fafine alofa ma uiga tausaafia o Puna. Na iu ina tau le mafai ona toe faauma mai ana upu mulimuli ina ua tagi masusu i lona misia o si ana tama e toatasi, ae sa faalototele atu i ai i latou uma sa iai i le talanoaga, ina ia lototele mo si ana tama, ina ia alu Luama o fiafia i le iloa, o loo fiafia foi laua i lana alu ese atu.
Na faauma le talanoaga a le aiga, ma ua talatalanoa solo lava ma talitalie, ma taupule le taimi e o ai le faaeega vaa i Faleolo, aemaise foi o se oso o le teine e alu ma ave i lana umu, mo si ona aiga lea o le a faatalia maia i Aukilani.
O le uso o le toeaina o Talivai lea ua faatulaga o le a nofo aoga ai Luama mo lona tausaga muamua, ona toe felogoai lea o ona matua ma le aiga, poo talafeagai pea le nofo ai o le teine, aemaise o loo finau ane foi le uso o si ona tina lea e nonofo ma lona aiga i Magele, e avatu ia te ia le tama a lona uso. Peitai o le faaiuga a Talivai, e sili ona nofo le teine i lona uso, nai lo le nofo i se aiga e iai se tamaloa e leai sona sootaga tau toto i lona afafine.
E faia pea
