O le mea moni lava na toatele le au fetagisi ai lea afiafi, aua e ui ina le lagona ni leo, ae ua tei lava ua toatele le au fogifogi isu a o tatalo le toeaina, aemaise lava i si faletua, ma nai teine o Aolele ma Pina, faapea foi le teine malaga.
Ua amene le tatalo, ona agai fai loa lea o le taumafataga a le faifeau ma lona faletua, o matua o Pina na alaala ane, faapea si loomatua o Filo, ae faifeau mai teine o le aulotu faapea ma Aolele, Luama ma Pina. Na maea lelei loa ona tali le sua a le vaega matutua, ona see lea o latou i le potu tele e malolo ai, ae faasolo le vasega lona lua. Tele taumafa eseese i lea afiafi, ma ua atili ai le pisapisao o le afiafi a le aiga i le sasala o le manogi o kuka a tamaitai o le maota.
Na maea uma loa gaoioiga mai tua i le umukuka, ona valaau lea o le toeaina o Talivai i lona auaiga e potopoto uma ane i luma i le potu malolo mo sana tautalaga. Na taletale laititi le toeaina ona muamua lea momoli lana faafetai ia i latou uma na saunia le tausiga faaletino o lea afiafi.
Na faafetai foi i matua o Pina i le faaavanoa o lo la taimi e oo ane ai latou te fai afiafi faatasi i le latou aiga, aemaise foi sa faailoa e le toeaina o Talivai lona talisapaia o le faauoga a si a la tama o Pina ma si ona afafine o Luama. E lei galo foi i le toeaina lana faafetai i si ona tuafafine mai Apia ma si ana tama, lea sa tuu atu i ai lo la faatuatuaga i le vaaiga o si ona afafine faapea Pina, a o faagasolo a la aoaoga i le Kolisi o Samoa.
Ona amata loa lea ona agai tasi mai le tautalaga a le toeaina i lona afafine ma le faamoemoe o le a malaga atu ai i Niu Sila mo ana aoaoga. “Luama, o maua lava ia o ou matua, ua na o ni meafaigaluega mai le Atua e tausia oe, o lana oloa na foai mai ma te tausia.
Ae o lou olaga atoa, e ma te tuu lava i aao o le Atua e pule faasoa mai o ia poo fea e faaaoga i ai oe. Ae i se tele ma se lelei e oo i ai se ma tausiga faalelalolagi nei, lea ua tatou penei ai i lenei afiafi ma e sauni atu ai mo au aoaoga i la atunuu. E ma te le o vilivili ia e oo i ni aoaoga maualuluga ina ia e toe aumaia ni taui se tele mo maua i se taimi mulimuli ane. Leai, o lo ma faanaunauga e tasi, ia ma tausia oe le meaalofa a le Atua mo maua, i se tulaga e sili ona lelei, ina ia toe iu mai lava lou olaga e aoga i le Atua ma lana galuega.”
