O se meaalofa taugata, ae ou te le mautinoa pe tatau ona ou faamamafa fua lenei meaalofa i lou mafaufau. Matou toe foi i Vaivase i le fale o Auntie Filo, ma tapena mai mea mo le malaga i le matou fale. O le afiafi lenei o loo fai ai le aiga faamavae a le matou aiga ia te au, mo lau malaga i Niu Sila.”
Na uma ona tusitusi le api a le teine, ona toe tapuni lea ma tuu i totonu o le pusatoso o lana pusa, ae savali mai i fafo e fesoasoani i le tapenaga o le taumafataga. E fai atu fua gaoioiga a le teine i lea taimi ae ua amata lava ona mamafa i lona loto le mea lea o le a tupu ia te ia.
O lea la e fai ma fai ane tala malie a nai teine o le aulotu e faatalie ai a latou faiga feau, ma tau ula ane isi ia Luama ailoga a toe iloa faa-Samoa pe a foi mai, ae ua tauau lava ina le iloa e Luama ata, ona ua maligi ifo lava ona loimata i le faanoanoa. Na iloa mai e si ana uo o Pina foliga faanoanoa o Luama, ona geno atu lea i isi teine e aua le toe faia se tala a se isi ia Luama.
Ua savali mai Pina ma pei e tau tatai mai Luama i le pito o loo iai le laulauai, e amata ona la tapenaina, ae o lana mea na fai e aveese mai ai le teine mai le umukuka. “Luama, o e ita i tala a teine la na fai?” E lei tali vave le teine ae o loo maligi pea ona loimata. “Leai, e le o leaga tala a nai teine, ae ua ese lava ou lagona e pei ua ou salamo ea i lou alu i Niu Sila.
O le a ou misia lava outou uma iinei, aemaise lava oe si au uo pele. Ua pei lava o oe o sou uso moni ma le tele o mea sa ta faia faatasi. O le tele foi o nei mea na tutupu lata mai nei i lou olaga, o oe lava sa e faufautua mai ma e iloa lelei lou mafaufau i nei mea. Ua ou le mautonu lava pe ou te fiafia pe a ou alu i Niu Sila pe leai.”
Ua tago atu Pina ma uu mai le lima o si ana uo, ma la saofafai ifo i nofoa o le laulauai, “se aua e te toe faalotolotolua. Na e fai mai foi ia te au o le filifiliga lenei mai le Atua ina ia e alu ese i se isi atunuu e faaauau ai au aoga.
Fiafia ma e tulimatai lou alu atu i lena atunuu. E gata lava foi i lenei taimi lou faanoanoa o le a e misia le olaga sa e masani ai i Samoa nei aemaise ou matua, ae tau umiumi loa foi, ona e masani lea i Niu Sila ma lona ia foi siomaga.
O ai na iloa pe tei ua faamanuiaina foi au e le Atua i se sikolasipi atu i Niu Sila pe a iu au aoga i Samoa, ona ou alu atu foi lea ta toe faifaimea faatasi ai iina.” O tala faalototele ia a Pina na toe amata ai ona matutu loimata o Luama, ma faauma loa le la tapenaga laulau.
Ua maea saunia uma le taumafataga, ona agai ane lea o tagata uma i le itu o loo iai le laulau ae saunia e le toeaina le tatalo e faafetaia ai le latou afiafi. Na umi le tatalo a le faifeau, ona o loo talosia ai ma le autu o lea taumafataga faapitoa, i le faamavae atu i si ona afafine e toatasi o le a latou taumavae ona o lana suega atamai i Niu Sila.
