O le malie o talanoaga a le faletua ma si ana tama i totonu o le potu o le teine, na galo ai lava ia laua le taimi lea e alu, ma le vevesi o fafo i le umukuka i le tapenaina o le taligasua a le alii faifeau ma lona aiga e faamavae ai i si ona afafine.
Ua malie lava i le faalogologo a le teine le faamatala maia o le love story o si ona tina, ae i le taimi e tasi o loo femoumouai solo ona mafaufauga, o nisi taimi e faanoanoa pe a mafaufau ua toeitiiti motusia le la mafutaga ma si ona tina, ae ua taliga fia faalogo foi le teine, i le faagasologa mai o le olaga talavou o lona tina, lea e pei lava e tai tutusa foi ma le faagasologa lea o loo iai nei lona ia foi olaga.
E fetaui lava le amata faauma ifo o tala a Luama ma lona tina, ae tuitui mai loa le faitotoa o le potu, o le teine o Pina lea e tautala mai fafo, o loo faaoo mai le feau mai le alii faifeau, o loo saili poo fea le loomatua ma lana tama, “O lea e fesili le toeaina poo fea oulua, o lea ua uma ona tapena le taumafataga.” E na o upu lava a Pina na lagona atu, ae lei tatalaina mai le potu.
Ua tei le faletua i le tilotilo ifo i lana uati, ua savali i le itula e 5 i le afiafi, ona savali faanatinati mai loa lea i fafo e toe faamautinoa le tapenaina o mea uma.
O Talivai o loo saofafai lava ma loa tuafafine, le loomatua o Filo, i le pito i luma o le potu malolo, ma fai a la tala. Ua toe agai mai Puna i fafo ae nofo ai pea Luama i le potu ma tapenapena isi ana mea. E tu i luga ma fealualuai solo lava ma tilotilo solo, e pei o se tagata o loo faasolosolo ona mafaufauga, ae i le taimi e tasi e peiseai o loo mamafa se mea i lona loto.
Ua toe saofai ifo, ona laga lea o lana ato aoga, ua aumai i fafo lana dairy, ona amata tusitusi lea. “O le aso lenei, sa matou o i le taeao ma Aolele ma Pina e momoli si a ma uo o Siaosi i le taulaga e pue ai lana pasi mo lona aiga.
Uma matou o i le faleoloa o Pat Ah Him e faauma le faatau. Sa ou faatali i le taavale ae o Aolele ma Pina i totonu o le faleoloa. Na ou faagalegale moe, ae faafuasei ona tu mai Pula i fafo ma talanoa mai. Sa aumai lau meaalofa manaia i le alii aoao, o lau fagu faamanogi, le White Diamond.
