Ua maea ona faasino uma e le tina mea a si ana tama, ona toe alu lea i fafo ae nofonofo ai lava le teine i lona potu ma toe amata ona faasolo ona mafaufauga i lona olaga ma le tele o faamanuiaga o loo ia maua pea, aemaise ai lava lona maua o ni matua e alolofa ma puipuimalu i lona olaga faateinemuli. E faasolo lava mafaufauga nei o le teine ma tagi, na amata i le na ona maligi o loimata, ae o lea ua tagi masusu ai luga o lona moega. Ai ona o lea ua avea le vaai atu o Luama i nei sauniuniga uma ua fai e ona matua, faatoa tau tonu ai loa lona mafaufau, o lea o le a valavala ma ona matua mo se taimi umi.
Na lagona mai e Puna o lea e tagi lana tama, ona toe savali mai lea i le potu o le teine. E lei fesili le fafine, ae na ia mateia le mafuaaga o le tagi faapea o si ana tama. Na ona saofai ifo lava i autafa o Luama ona ia opo mau atu lea o lana tama ma la fetagisi ai lava. E oo foi i si faletua, e ui ina talatalanoa lototele i le fiafia o le a alu si ana tama e aoga i Niu Sila, ae o totonu i lona loto o loo tumu i le faanoanoa talu ai, o le a umi se taimi e lē toe vaaitino atu ai i si ana tama e toatasi. Pe la foi e iai nisi tamaiti, aua na o Luama lava le tama a le ulugalii.
Ua uma le la fetagisiga ona nofonofo lava lea ma talatalanoa. Sa taumafai Puna e faamatala i si ana tama le olaga i Niu Sila, aua na umi foi se taimi na nofo ai o ia i Niu Sila ma aoga a o lei fetaui ma le alii aoao o Talivai.
“E te iloa oe Luama, ana le toe finau malosi atu ou matua ou te toe foi mai i Samoa, semanu ailoga ma te nonofo ma si ou tama. Ae fetaui lou taunuu mai i lou aiga ae o le vaiaso lena na tuua ai i tua Malua, sau ai lea o Talivai e tafao mai i le matou faifeau, ae ou lotu ai loa i le Aso Sa. Ma e lei tilotilo faalua lava Talivai ia te au, ae sau loa ma le molimanao.”
Ua matutu nei loimata o Luama ae ua sagai atu i le malie o le tala a si ona tina. “Na e ioe la ia Papa i lena lava aso?” Ua ata si faletua, “E leai. O le taimi lena e moni lava ua ou fiafia e toe foi mai i Samoa, ae matua leai lava sou igikalesi i se tama Samoa, o la e alu lou mafaufau i si tama palagi na amata ona ma faamasani ina ua latalata i le iuga o a ma aoga i le kolisi sa ma aooga faatasi ai. Ae na ou fai i ai ou te sau sei faataunuu le manao o ou matua ona ou taumafai lea e toe foi atu i Niu Sila e faaauau le ma uo.”
I foliga alofa o le teine i lona tina na toe fesili ai, “aisea la na e le tausisi ai i lau folafolaga na fai i si au uo palagi lena?” Ua tilotilo sao Puna i mata o si ana tama ona tago atu lea ua toe opo mai le teine, “na semanu ou te le maua ai oe la‘u pele Luama.
Ma le isi mea, o lau filifiliga lena o le palagi, ae o le filifiliga a le Atua mo au, o lou tama, le alii aoao e uigaese ona le tamalii ma le faakerisiano o ona uiga. O le aso lava na ou muai talanoa ai ia Talivai, na feemo ai uila i ou mata, ua taia au i se malamalama uigaese o se faaaliga mai le Atua o loo taumafai e tau mai, o lo‘u tofi ma lo‘u nofoaga lea, o Talivai.”
