Na tetei le autamaitai o Aolele ma Pina i le foi ane, o loo moe saofai le la teine i le taavale, a o loo taatia i ona autafa le ato pepa o loo iai totonu se meaalofa. Na matua le talitonu Aolele i le tepa atu i le fagu faamanogi taugata lenei o loo i totonu o le ato. Na fesili Aolele ona faamatala lea e Luama si a la feiloaiga puupuu lea ua faafuasei ona toe fetaui atu ai ia Pula.
E faamatala lava le teine ae na o le ataata o Aolele ma alu le taavale. ‘Fai atu foi la o oe a Luama, foliga mai na fai se lua tonu ma Pula e te lua fetaui iina, fua foi i le faafuasei ona oso lou ulu ma e fai mai e te faatali atu i le taavale, ae ai lava na e iloa o le a alu ane ai lau kama.’ Ua tau le fiafia si teine o Luama i lenei tuuaiga ua fai.
‘Ae faapea na iloa e Pula o le a tu le tatou taavale i luma o le la faleoloa. Faapea na ou fai atu tatou te o i o i lea taimi o le aso. E le sao lena tala, pau lava ua fetaui le alu atu a Pula ma lou nofonofo i lena taimi i le taavale. Ae na fai mai lana tala, o la sa faatau lana meaalofa e alu atu ma ia i le malae vaalele.’ Na lagona e Aolele e sao le faamatalaga a si ona tei, ona le toe tautala lea ae ua taumafai e sui le mataupu.
Ua taunuu le pikiapu a le autamaitai i le fale lea e nofonofo mai ai si loomatua o Filo ma faatali le oo atu o le faatauga ua toeititi uma le afa o le taeao. Na ona papai lava o teine i le fale, tapena uma loa latou mea i le taavale, aua e manao le loomatua ia vave ona taunuu i tua ma amata fai latou kuka mo le afiafi. E taunuu le loomatua ma lana fanau i tua ia Talivai ma Puna ua toeititi lava ta le tolu i le afiafi, ma sa fiafia le faifeau toeaina ma lona faletua ina ua taunuu manuia atu le faiga malaga ma talatalanoa fiafia ai lava.
E tele taumafa eseese na tapena i ai le faafeagaiga ma lona faletua mo le latou aiga faamavae ma si a la tama. E fai foi o kuka a Filo ma lana vaega atu i Apia, ae lei tuumamaina foi e teine o le aulotu a Talivai lea e nonofo ai lava i le fale o le faifeau. E le gata i taumafa mamafa ae na tele foi mea suamalie na saunia. A o fai la sauniuniga nei mo kuka o le aiga, ae valaau ane Puna i si ana tama e alu atu i luma, ma na faateia le teine ina ua tatai e si ona tina i lona potu ma iloa ai, le tele o sauniuniga ua uma ona faia uma e ona matua mo ia ma lana malaga.
Na maligi loimata o Luama a o tilotilo atu i le matagofie o tapenapenaga a nai ona matua, aua o lavalava fou uma lava nei e vaai atu i ai o loo gaugau mai totonu o lana atopau, ma e mautinoa e Luama e ui o Niu Sila lea e alu i ai, ae foliga e le moomia ona ia toe faatau lava se isi mea iina, aua o lea ua iai mea uma mo lana faaaoga i totonu o ana atopau.
