Ua faafuasei ona toe toia foi le teine o Luama i le itu lava lenei o alii, ina ua fetaui le latou o atu ma Aolele ma Pina e fai le latou faatauga i le taulaga, a o lenei ua fetaui tutu ai lava ma lana tama, le alii aoao o Pula.
Ae aua foi le fetaui atu, ae o lea e feosofai solo Pula ma le meaalofa e ave tonu lava mo Luama. Ua le gata la ina foai atu le meaalofa, ae toe taotao tua atu ai foi ma isi mau lagona faamemelo o si alii aoao mo le tausala, lea foi ua toe faatalatala i le mafaufau o le teine, aemaise o lenei meaalofa matagofie na ia saunia.
Na uma lenei feofoofoaiga o lagona faafetai, ona liliu loa lea o Pula ma toe savali ese atu agai i le maketi, ae toe oso ifo Luama i le taavale e nofonofo ai ma faatali teine ia e o i totonu o le faleoloa. Na toe iloilo e Luama lenei faamanogi taugata ua foai e Pula mo ia.
Ua mafaufau le teine, e le taitai ona gafatia ona faatau se faamanogi faapea e ui i sona faavalea i ai. Aua ana le seanoa foi le fagu na lafo mai e le uso o lona tina mai Ausetalia, e le taitai pipii lea manogi matagofie i lona pau.
‘Pe na faapefea ona iloa e Pula o le fagu lenei ou te fiafia i ai.’ Na galo ia Luama, o lea sa masani ona ia faaaoga lana ‘taimane paepae’ (white diamond) i taimi uma e o ai ia latou valaaulia mai ia Pula.
O le manogi foi lenei ua manatua lelei e Pula i taimi uma e latalata ai ia Luama pe a talanoa, lea na manao ai ia toe alu lava Luama ma se isi ana fagu e manogi ai i Niu Sila a o ia manatua atu i Samoa, aemaise o lea o le a manogi ai foi ma ia i le ituaiga mo alii.
