“Aisea ua e faatau ai lenei mea taugata mo au? Ou te lei faatalitalia se mea faapenei Pula. Ma e le faigofie ia te au ona ou talia lenei meaalofa mai ia te oe, ae le o atoatoa atu sau tali i lou manao.”
E lei uma lelei atu upu a Luama, ae tago mai Pula ua tuu ona tamatamailima e lua i le gutu o le teine e pei e taofi ai lana tala o loo fai. “Luama, aua e te tautala mai faapena ia ta ita. Afai lava e alu alu lou mafaufau e te le filifilia lava ita, faamolemole Luama, talia pea lau meaalofa lenei.
O taimi uma e te faamanogi ai i lenei fagu, ou te manao ia e iloa, o lou manogi foi lena o lea ou te lagona atu i Samoa nei i aso uma o le a ta valavala ai. Faamolemole Luama, ia e laeiina lenei manogi i aso uma e te iai i Niu Sila.” E fai tala nei a Pula, ae o loo faaaliali atu ia Luama le isi fagu e tutusa lelei, lea e foliga o le fagu lea mo ia, le ituaiga mo alii.
Maeu se alii ina a fai meaalofa ofoofogia! Ua faafetai atu Luama, ma sa ia iloa lelei lava le mea lea e faatalitalia e Pula mai lana faafetai, o lea e ui i tagata o loo fegasoloai ane i lea taimi, ae na aapa atu lava le teine ua opo mai si alii aoao, ma sogi faamaoni atu i ai mo le meaalofa.
“O le a ou talia lau meaalofa, ae sei maua sau galuega i Niu Sila, ona ou lafo mai lea o se meaalofa mo oe.” E ui ina faanoanoa Pula, ae ua alaga fiafia lona loto ina ua talia e le manamea lana meaalofa na saunia. “Luama, o oe lava o le taimane taugata ia te au, o le ala foi lea o lo‘u manao e te laeiina lenei faamanogi o le taimane, ona ua talafeagai lelei mo oe.”
E faia pea
