Tauulaula o le alofa vaega 60

“O la e o atu e faauma mai le matou faatau. A o fea a alu i ai lena solo?” e fai lava le fesili a Luama ae ua tatavale lona fatu, ua ese ona faalogona i le papai mai o lima o le alii o Pula.

“Na ou sau e fai atu si au tamai faatau lea,” ma sisi ae lava i luga le ato pepa meaalofa, ae le o iloa atu e Luama mea o iai i totonu. “Na ou tu mai le isi itu, ae ou vaai mai o afe le tou taavale iinei, lea na ou savali mai ai faapea lava au na o Aolele ma Pina lea e o mai, ou te lei iloa mai oe.

O le a le mea ua tupu? O oe ea e te faamaimai?” ua sosoo lava nei fesili a Pula, ae na o le saofai o Luama ma faataupupula mai i ai. Peitai atonu o foliga faanoanoa o le teine lea ua tau masalosalo ai Pula, e iai se mea o tupu ia Luama. “Leai se mea o tupu. Pau lava pei ua ou faanoanoa o le a ou misia lo‘u aiga, nai o‘u matua ma si a‘u uo o Pina. Ia ae le afaina e alu foi toe sau.”

Talofa e, ia Pula! Ua toe maligi foi mea taugata a si alii aoao, a o ia toe lagona atu le siuleo faagalo gata lenei o loo manaonao pea i ai faalupe o naumati lona loto i le ao ma le po, ae o lenei lava o le a iu ina mou ese atu e aunoa ma se mautinoa i lona loto pe toe iai sona avanoa e toe faalogo i ai.

Ua faanounou ifo Pula e faafesagai lelei ona foliga ma le faamalama lea e iloa lelei atu ai le teine, ona ia tuu atu lea ia Luama le ato meaalofa lea sa ia uuina. “Na tuu ou te vili atu e talosaga tasi atu pe mafai ona ou toe vaai tasi ia te oe a o e lei alu ese atu, ma momoli atu sina meaalofa faatauvaa, tau lava ina ia e manatua ai e moni lo‘u alofa ma lo‘u manao ia te oe.

Ae atonu e sili ai ona avatu loa manū o lea ua ta toe fetaui, leaga o lou vaai soo atu ma ou toe faalogo i lou leo, o le a atili ai ona mamafa le avega o le a ou tauaveina a o e alu ese atu.”

E lei vave faia se tala a le teine, na o le saofai lava ma tilotilo ifo i le ato lea ua taatia i ona vae. Ona o le teine e malo ia te ia ona uiga tamalii, e ui ai lava ina lei manao i lea mea lea ua ia faia, ae na tatala lava le faitotoa o le taavale ma oso ese mai i fafo, ma tu loa e faalagolago i le taavale, ae faasaga sao atu ia Pula.

Ua toe aapa atu Luama i totonu ma aumai i fafo le ato meaalofa, ona ia tago lea ma to ae i fafo le fagu faamanogi tamaitai o loo iai. Ua ofo Luama i le taugata o le tau o le fagu lea e vaai atu i ai, ae o le fagu tonu lava lea ua leva ona moomoo e fia faamanogi ai, ae o lenei ua faatei ai o ia e si alii aoao.