Tauulaula o le alofa vaega 60

“Ae a, o la e sao tama, e moni lava ta te taaalo ma ta talie i le tele o taimi, ae ou te iloa lava e ese mai ou uiga i le toatele o teineiti o le tatou auga tupulaga. Peitai ou te mafaufau lava au, leaga o oe o le afafine o le faifeau, na e ola mai lava oe i le tausiga faaleagaga a ou matua.”

E lei toe tali le teine o Luama, ae ua na o le saofai ma pei o se tagata o loo mafaufau loloto i se mea. “Ia sei ou alu ia i lau aoga,” o le isi lea ana faaopoopo. “Afai lava e fai atu ou te toe foi mai i se tama Samoa, ia e leai foi se mea o iai. Atonu o le finagalo lava lea o le Atua mo au.

Ae afai e te faalogo atu o le a ipo lau teine i se mulivae paepae i Niu Sila, ona e sauni lea e te alu atu e toso le ta veli.” O tala nei a teine na toē leotetele ai, ma ua tau liliu mai i ai ulu o nisi sa aai latalata ane.

Ua foi ane Aolele ma latou keke puaa vevela ma faguinu, e amata ai le aoauli a o faatali a latou aiga mamafa. Na ona saofai lava o Aolele, fesili loa, “Ia sei fai se tala lata mai, o le a se iuga ua oo i ai tou faiga mea ma ou matua ma le alii aoao siaula Luama?” Ua toe ea ae si teine ma ona foliga e pei ua atugalu, ai foi o le a toe amata ona laga lenei lava mataupu ia Pula.

“E, ia o lea ua faauma si na mea. O la ua nofo malamalama foi i ai le alii aoao. E oo foi i lau tama o Onosai, ua matua taai lava fala o si na toeaina latou. Lona uiga, o le a alu mamā lava le malaga a si ou tei e faaauau lana aoga i Niu Sila, ae tuu filemu taulelea ia o le atunuu atonu lava o iai nisi tamaitai e talafeagai mo laua.”

Ona faasolo lava lea o le taumafataga a le toatolu lenei ma talatalanoa, ma o le mea malie, na amata o leotetele tala ma taliē, ae ua fai ifo lava leo ma ua vaaia foi foliga o Luama ua susū i ona loimata.

“O le a ou misia oulua pe a ou alu. Ae o le a ou taumafai lava e tusitusi mai, tusa pe tele au meaaoga. Pe imeli mai foi e lelei e puupuu.” O le mea moni lava ua taufai maligi uma loimata o le au tamaitai ia latou tala ia e fai, ona tei lava lea ua aai lē leoa ai.

Na uma Amani ona toe o lea e faauma le latou faatauga i se tasi o supamaketi tele i le taulaga. Na paka le taavale i luma o le supamaketi, ae ua faanoi Luama ia Aolele, e o na o laua ma Pina e fai mai le faatau, ae sei faatali atu i le taavale leaga ua niniva lona ulu.

A o nofonofo le teine ma tau faagalegale moe, ae na faafuasei ona pei e oso i se mea ina ua ia lagona le maluluina o lona alafau, o loo papai mai i ai le lima o se tagata. Oi aue, o le alii aoao foi ua toe iloa atu, o loo tu mai fafo o le taavale. “O le a le mea ua e moe ai  na o oe iina? A o fea Aolele ma Pina?” Ua toe nofo sasao ae Luama i luga.