Na uma ona faaee si a latou malo faaaloalogia, ona agai loa lea o Aolele, Pina ma Luama e fai le latou faatauga mo le ‘aiga faamavae a le aiga lea o le a o uma ai i tua i matua o Luama i lea afiafi.
E fiafia lava Pina ma Aolele a o faasolo le lisi o mea e faatau, ae o le teine o Luama, ai ona ua amata ona tau i lona mafaufau le latalata mai o le aso o le a alu ese atu ai, ua tei ai lava ua oso ae ona lagona faanoanoa, aemaise o le a ia misia si ana uo mamae o Pina.
Na ta le sefululua ona fai lea o le tonu a le au tamaitai, o le a sei fai sina koma i le faleaiga o Amani, sei toe tofo tasi Luama i le lololo o keke puaa a Amani a o lei alu atu i Niu Sila.
Na afe le pikiapu a le au tamaitai, ona agai lea o Aolele e ota le latou taumafataga o le aoauli, ae saofafai ifo Luama ma Pina i le latou laulau i le pito i fafo o le faleaiga, ma talitalie ai lava a o matamata solo i aga a tagata o loo aai i le faleaiga.
Ua oso nei le fesili a Pina, “A siaula Luama, faamata e te toe mafaufau mai i le aualii ia na fai mai le la tauvaga ia te oe? Faamata o ai o laua o tau iai sina ou mafaufau i ai?” E lei vave tali Luama, na o le ataata lava ma saofai. “Ua e toe laga mai foi lena mataupu o lea ou te taumafai e faatea malie ese atu.
I le taimi nei lava ia, o loo ou mafaufau pea ia laua uma, e le i se lagona fia uo i ai, ae ou te mafaufau i le pogai na mananao mai ai nei alii ia te au. O le tala lea sa tele ina fai mai, e fiafia i ou uiga. Ia ae o ou lava ia uiga masani, ou te lei iloa e ono manao ai fua se isi ia te au. Ae o le a so oe manatu ia te au Pina? E te ioe e lelei ni ou uiga?”
