Tauulaula o le alofa vaega 59

Ae o le mea sili, ua toe solo lelei nei le laufai na semanu e masae a le toalua lea, ona inuinu lava lea o la iputi ma talatalanoa solo i le aoga ma isi tamaiti o le aoga, ma faatali ai le feala mai o le latou fale.

“Luama, malie lou loto, faamagalo mai si ou tuagane faavasivasi pe afai foi ua tau vavevave atu ni lagona. Ae faafetai lava mo au timaiga lelei mo a‘u. O le a avea foi o se taiala e taitai ai lou olaga a o faasolo au aoga. Ou te mautinoa o le a le galo ia te au nei upu alofa ua e aumaia i lenei aso. Faafetai foi i le Atua ua ia aumai lenei avanoa ou te faalogo ai i ni upu lelei mai se tagata e matau i le Atua.”

“O le mea malie ou te le ma e ta‘u atu, e ese mamao le mea na sili ai ona ou fiafia ina ua tou valalaulia au tatou te tafafao. Ae o lenei ua e talanoa mai, ua matua sili atu ai nei lou fiafia, na semanu ou te le maua lenei avanoa faaauro e aumai ai e se tamaitai ni upu aoga e tomatauina ai lou olaga o se taulealea talavou.

Faafetai lava sis.” E lei toe tali Luama i lea mataupu, na o le ataata lava ma inu lana iputi. E lei umi ona uma le la mataupu maaleale, ae vaai atu loa ua savalivali mai i fafo le isi la teine o Pina.

Ua tapena nei le malu o le taeao, ma ua alafai ane foi si loomatua ma le teine o Aolele ma amata loa le latou mea taumafa, ma fai le tonu e o Aolele ma teine e momoli Siaosi i le maketi e pue ai sana pasi i lona aiga auā o le taeao lea o le Aso Toonai, ae fai mai ai ma se latou faatau o mea e ave i tuā pe a ō i le afiafi, lea o loo fuafua e fai ai le aiga tele a le aiga i le maota o matua o Luama, e faamavae ai i le teine mo lana malaga.

Talofa e, i si tama o Siaosi, a oti i le fia talosaga atu mo se isi avanoa e toe auai ai i le isi lea faatasiga a le aiga, peitai ua tatau lava ona faasee tuagalu loa si ona sa, ua oo i le taimi ua tatau ona patino ia Luama lava ia ma lona aiga.

Peitai a o lei tuuina Siaosi i le maketi, na fai i ai Luama, e toe logo atu o ia i le taimi tonu e alu ai lana vaalele, ona sau lea latou te o e faaee o ia. Na malie atoatoa Siaosi i lea tonu, ma faamavae mai loa i teine ae savali atu i le itu e faatali ai lana pasi.

E faia pea