Tauulaula o le alofa vaega 59

“Siaosi, alu e nofo i lalo, ae ou faia atu ta iputi. E lē o le mea lena ou te manao e te faia i le taimi lenei. E lē o mea na e tatau ona tatou faia i le taimi lenei, si ou tuagane foi.” Ua toe mei teisi Siaosi i le isi itu ona tūtū ai lava lea ua le tautala, ae ua faasaga atu nei i ai le teine ma sasau atu loa le lauga.

“E tutusa lava lau tala ia te oe, ma lau tala na fai i isi tama ia na mananao mai e fai se matou faigauo. E le o se mea leaga le faiuo, ae o mea uma lava e iai o latou taimi ua faatulaga e le Atua e faataunuu ai. Ma o filifiliga nei e le tatau ona tatou taaalo i ai pe fua i ni lagona e puna faafuasei ae.”

“Atonu e te ita nei ia te au ona o lou le talia o se mea o e manao ai. Ae talitonu mai oe si ou brother, e oo mai le taimi e te toe faapea ifo ai, ‘faafetai e lei vave ona saisaitia lou olaga talavou ia te au’ aua e tele le lalolagi, e lasi ni filifiliga e mafai ona e faia. O lagona na e te faapea o ou faalogona moni, ou te tautino atu Siaosi, o tuinanauga na e puna i soo se talavou lava a o faatoa amata ona tauosooso le malaulau faatalavou.

“E te le o vaai atu i le toatele o tamai ulugalii ia ua amata ona toe malepelepe latou aiga. O ulugalii tonu nei na amata i le taimi faatoa aasa ae lagona nei, e pei o se mea fou ia latou, manao loa e faataitai.

Ae amata loa ona faaopoopo tiute e aumai faatasi ma le faitoalua, toe pupula atu loa e faigata le olaga, ae paga lea, e lei nofosauni i ni auala e fofō ai na faigata. Sa‘o ai loa le isi muagagana, ‘E toe tagi fua Kelī, ua i totonu o le vaa o Egelī.’ O nisi lava la e faaulu malo ma toe sola ese mai le faaipoipoga, a o nisi foi, ua sa‘o ai le upu, ‘ona fusu tagi ai lava lea.’

Ua tele le toe fia faamaamulu, ae ua faigata ua iai tamaiti, ma isi mea uma na semanu e le taitai popole fua i ai, pe ana faapea o la lava e taataanoa ma faaaoga lelei le talavou.”

Ua laki o le tuai ona feala ane le isi vaega o le aiga, ua uma lelei ai le aoaiga o si tama o Siaosi ma toe fai le iputi a le toalua lea, ae leai lava se isi na iloa le masiasi o si tama i lea taeao. O le mea la lea ua tupu, ua tea malie atu nei le faananau o Siaosi i le lalelei o le teine, ae ua na o nai ona moomooga le leoa, ‘talosia ia ota maua se toalua faapenei le atamai o le mafaufau.’