Talofa e, ia Siaosi, ua moni lava le upu a le Saina, ‘A‘u kele mea magava, a‘u lē mafai kaukala.’ Na uma lava evaga a le vaega lenei ua leva le po, ona faamavae loa le o teine e o i tua i le la potu e momoe, ae faatulaga ane le potu malolo lea o loo iai le sofa, na teu e moe ai si a la uo o Siaosi.
E leiloa e le au tamaitai, na pauu loa laua i o la moega taufai taagugulu loa, peitai o Siaosi, e ao lelei e lei mafai ona moe, i le feliuliuai solo ma mafaufau pe mata lava e iai sina isi avanoa e mafai ona ia maua ai se fesootaiga ia Luama manū e lei alu ese mai Samoa.
Na oo mafaufauga o le tama i nisi itu faalupelupeina, ae atonu ai ona o si tama e lei matua mamao tele i tua se olaga ua oo i ai, e lē pei o le alii loia ma le alii a‘oa‘o e fai sina mafamafa o a la pomu ia sa tau tatao ane ia Luama, ae na toe afu ai lava.
A o Siaosi, na pau le mea sa toe tau i ai lona mafaufau, pe le mafai ona toe alu tasi lava e tuitui le potu o teine e faaauau pea latou talanoaga, ona o lona fia tilotilo pea i foliga o le tamaitai o loo faananau i ai lona loto. Ai ana tautala ane aluga o loo aluga ai Siaosi, ua leva ona faalilii ma savavali ese, i le faafia selau ona liliu ma liliu.
O nisi lava taimi e liliu ona ua amata ona vevela le isi itu, ae o nisi foi taimi e liliu ona ua amata ona susū, a lē o loimata, o le afu, poo fāua foi sei tulou, o le alii o Siaosi, ona o le mafatia i ona lagona nei ua pei o se fiva e taai i totonu o lona loto.
