E muta le tatou tala i le vaiaso talu ai, ua latalata le taimi e fai ai le pati faafuasei a Filo ma si ana fanau teine, ma le latou malo faaaloalogia o Siaosi.
Ua tei lava ua tele faatopetope taumafa a le aiga e peiseai e toa fia sefulu ni tagata o valaaulia, ae semanu na o le toalima lava tagata nei o le a pisapisao ai le pati.
O uiga faaleuo foi o le loomatua o Filo, na atili ai le fiafia o Siaosi, e le gata ua toe sosoo atu sia taimi e tafao ai ia Pina ma Luama, ae o loo talotalo malie le loto o Siaosi, talosia e fai mai le loomatua e mafai ona nofo e moe ai i le latou fale i lea po nai lo le toe momoli foi o ia i lona aiga.
O isi lagona mimita o Siaosi lea ua iai nei, maimau e, pe ana iloa mai e Pula o lea na tigaina i nei mau aso e tele e tau faalata le fuia, a o lea ua oo i toe aso mulimuli o fiafiaga ma le tausala, ae ua foliga mai ua na o ia lea ua taulia i le aiga, ma mananao le aiga o Luama e alu atu e tafafao ma teine a o lei malaga ese atu Luama i Niu Sila.
O le mea moni lava, o loo mateia uma e Luama moomooga nei o si tama avetusi o Siaosi, ae le o manao Luama e faavevesi nei le manaia le latou afiafi ma toe faaletonu atu ai le latou mafutaga ma si tama. Na faapea ifo Luama i lona loto, ‘peipea ia si tama sei fai tasi si ana matanana, aua ou te saofai loa i totonu o le vaalele, bye, bye uma loa latou ma kolosi uma ese mai lau lisi’.
Na manaia lava le gasologa o le fiafia a Filo ma si ana fanau i lea po. E fai o le susua o taumafa eseese na saunia e nai teine, ma latou pizza ia na ota, ae o le leotele o le laau pese lea na manao lava Filo ia ki leotele ina ia lagona uma mai e tuaoi, o lea ua oso le pati i lo latou fale.
E lei misi foi le tufa masani a le loomatua ma lana fanau i nai o latou aiga tuaoi, aua o lea ua sasala le manogi o taumafa, e mautinoa foi la ua faatalitalia e aiga e le mafai ona le alu atu se sii laulau a Aolele ma nai ona tei i se taimi.
Ua ofo teine i le malie o le latou siloo i lea po, aua e toetoe lava o pese uma e tu ai i luga le loomatua ma piki solo ana paga la te sisiva, ae tele lava ina faaiu mai i si tama o Siaosi.
Ua toe tau nei mafaufau o teine, o le mea foi lea a le latou loomatua na fai i si tama o Onosai, lea na matua niniva ai Onosai i le faauosi faataamilomilo e Filo i le po atoa, ma tau le mafai ai lava ona maua se avanoa e siva ai si alii loia ia Luama, o le tagata tonu lea na mafua ai ona manao e alu atu.
Peitai, e foliga o loo matapoto Siaosi i lea po, ai ona o lea e nofouta Siaosi i le sikaili foi lea a Filo na fai i si tama o Onosai, aua na faamatala uma lava e Pina ma Luama ia Siaosi i le aoga.
Na ta loa le isi pese vave, luga loa ma Siaosi laa mai ma faasiva si loomatua, ma na iloa lelei lava e Siaosi e fai sina umi o le pese vave lea, fuafua loa o ina lava e matua gapelu ai Filo lea o le a ia faasivaina.
Ma na pa lelei le aikia a Siaosi, aua na fiu le loomatua e fia nofo i lalo, ae ua matua fuli Siaosi e lalolalo ma faatavi‘o solo lona tino ma osooso faataamilo ia Filo, ma fai mai i ai ana taga malie e faaoso atili ai le loomatua e tali atu i lana siva.
Na uma loa le pese lea, sisii ma lima o Filo, o le a sei fai sana malologa. Na tei le loomatua o loo tau to lava le sela ma tapili lona ili, ae faalogoina loa ua tatagi le pese gese, ma le tepa ae i luga, ae ifo loa Siaosi ia Luama ma taitai mai le tamaitai i luga e fai le la uosi. “Ei George, ese lou poto leaga a ea?” o le valaau lea a si loomatua ma ata. “Ua e tago lelei faasela a‘u ia ou nofo ai, ae sei tope si au mea lena ua fai”.
Na alu le talie a le au tamaitai, a o saofai pea si loomatua ma lulu le ulu, a ua na o le ata o Siaosi ma taumafai e faamaopo lelei atu le fusiina atu ia te ia o si ana paga lea ua iai nei.
Na lagona e Luama e pei ua tau ese le siva a si a la uo o Siaosi ia te ia, ona musumusu atu lea i ai, ‘sh sh, fai faalelei le ta siva, i faaiu puta le tatou afiafi.’ Ua faataga ata si tama o Siaosi, ma toe tau mei teisi i tua e fai sina va ma le tamaitai o Luama, ona faapea ane lea i si ona leo tau le lagona, ‘tafefe o le a e alu ese atu lava ma matou, e le mafai e se isi ona gausia lou loto malosi.’
Na ataata Luama ma faasesepa ona mata ia Siaosi, ae na toe faapea ane le tama, ‘Luama, o le mea tonu lava lena e ala ai ona faavalea mai tama ia te oe. O ou uiga tauagafau, aemaise o lou lotomau e tausia lou tulaga mamalu o se taupou. Amuia lava se tama tane o le a ia maua le faamanuiaga na te muai āsa lena vao mu’a matagofie.’
Ua na o le siva lava o le teine ma ataata ona foliga, ma e fetaui lava le faaiu o upu a Siaosi, ae faasolo foi ina uma le fuaiupu mulimuli o le pese, ma faauma atu foi ma le la soa. Na patipati leotele le loomatua o Filo ‘Malo, malo le siva. Manaia le soa lea.
Ia sau se isi soa!’ Ona faaauau ai lava lea o le fiafia a si loomatua ma lana fanau, seia tau lava i le ‘afa o le sefulutasi i lena po. Ua na o le saofafai nei ma talatalanoa ma faasolo le iputi e inu ai le latou keke sukalati na faatau atu e Aolele, ae o le taimi lea o loo talotalo lava le loto o Siaosi, talosia ia tutusa ona moomooga ia e iai, ma se manatu o le loomatua e fai ane ai se tonu mo ia i lea po.
‘Aolele, e a, e tou te malolosi e tietie e momoli si a tatou malo faaaloalogia i lona aiga? O lea e tau fai atu lau tonu pe le manao si tama nei e moe, ona alu lea e moe i le potu la e avanoa, ae afai e manao pea e alu, ona tou faamalolosi mai lea si au fanau foi, e o e momoli si tama.’
Tafefe, e le o iloa mai e Filo, ua foi faafia mai le lagi le saputu o faafetai a Siaosi i lea taimi, ona e foliga lava e ono maua sona avanoa e moe ai i le fale o Luama i lea po. Na fai le tonu a Aolele, afai e manao ai Siaosi, e sili ia ona moe leaga e fai sina mamao o le mea o le a toe o atu i ai ma teine ua leva le po.
O le poto ia o Siaosi. E tiga ona faalogo atu ua toetoe a le mafai ona taofi le fia fai atu ia o le mea moni o loo manao ai, ae ua faataga nofonofo lava ma ona foliga peiseai o loo tau le mautonu pe alu pe nofo.
Ona faapea atu loa lea o si ana tala tau le lagona ia Filo, ‘ia afai e talafeagai ma oe le tina ma ou alo, ona ou nofo lea. Ou te alofa foi i nai teine; e sao ai, o le a toe mamao le o atu i lenei taimi o le po. Sei ou toe vili i lou tina e tau i ai le tonu lea ua fai.’
Na mautu uma loa le tonu ma ua manino mai le moe o Siaosi, ona ō uma lea o le toatolu lea o Siaosi, Pina ma Luama, e tapena ma faamama ipu na fai ai le latou pati, ae agai Aolele e faamālū ma fai nisi o ana galuega sa avatu i le fale.
O si loomatua foi ia, ai ona o le vaivai i le tele o lana faamalositino lea na fai ia latou faiga siva, ua na o le nofonofo ai lava i lona nofoa faaluelue ma matamata atu i gaoioiga a lana fanau lea e fai, ae ua leai ma se tautala, seia oo lava ina faatofa mai ma agai loa i lona potu e moe.
Na uma ona tapena mea a teine ma Siaosi, ona toe ō ane lea i luga o le laulauai ma fai ai lava le fale talatala ma faasolo le iputi, ma e foliga e leai ma se isi o latou o fia moe i lea taimi o le po.
E fai lava a latou tala ma fai puega ata, ma ua atili ai le mimita o Siaosi, aua ua matua tele ai lava o la ata ma Luama ia ua maua. Ma ua matua nofo sauni Siaosi, ia mautinoa e maua uma atu ni ana kopi o ata nei, sei fai ai lana display tele i le aoga ma le latou aiga.
Talofa e, ia Siaosi, e fai atu lava ana tala faatuafafine ma isi ana mau tala malie, ae i le taimi e tasi o loo taumafai malosi, e tau omiomi i totonu lona fia sasaa atu ia Luama o ona lagona nei ua malolosi ae lava, aemaise o lenei ua alu le po o faasagasaga ma talanoa i le teine, ma ua matua ioeina ai e Siaosi, maeu se tamaitai ina a lalelei.
Peitai ua moni lava le upu a le Saina, ‘A‘u kele mea magava, a‘u lē mafai kaukala.’
E faia pea
