Ua nofo tatā ae i luga Luama, ma mafaufau poo le a tonu le uiga o lea miti ua ia faia. Ua mafaufau le teine i ana tautinoga ia ua folasia i luma o ona matua, ma sa faafofoga foi i ai le alii aoao na alu au lana faamalamalamaga ia te ia, a o lenei ua foliga ua faataimua mai e le miti se mea e ono tupu i lana sailiga atamai o le a agai atu i ai. Ua tau ita le teine i lana miti ua fai, ona alu ane lea tapena le la potu ma Pina ma tau faatea ese ai lona mafaufau i le miti na fai.
Ua amata tapenapena foi ana mea uma, aua ua toe lua i le vaiaso e alu ai, le umi lea e totoe mo ia i Samoa. Ua tau le mafaufau o Luama, o lea ua mua ona vevesi solo, ae tatau lava ona toe foi i le Kolisi e faamavae lelei mai i lana vasega, ma sei piki mai ona lipoti ma se tusi mai le pule aoga e alu ma ia i lana aoga fou i Niu Sila. Peitai a tau le mafaufau o Luama i le alu i le Kolisi, e muamua taia mai le vaai atu faalemafaufau i le alii faiaoga o Pula, ona toe tau fetoi ai lea o lana alu.
“Ta le lavā foi alu atu ae toe alu ane foi Pula ma nisi upu molemole,” o mafaufauga ia o Luama, e peiseai ua avea ai le alu i le aoga o se mea mamafa ia te ia.
E faia pea
