O lea ua mafola lelei mai nei la sia mataupu, ma ua lagona foi e le teine o Luama e pei ua māmā uma mea ma matuu ese atu se avega mamafa na ia tauamoina. O lea ua uma ona faamuta lelei si mataupu latou ma si alii loia, le tama o Onosai, ae o lea foi ua maea ona faamatuu ese atu le mataupu latou a si alii aoao, le susuga i le alii faiaoga o le Kolisi a Samoa, le tama o Pula. Ua manatu nei la Luama, pau lava la le mea lea ua tatau nei ona taulai atu i ai, o le tapenaina o lana malaga, lea toe 2 vaiaso ona faataunuu loa lea, ma faatofa atu ai i laufanua o Samoa, ae faatalofa atu i atumauga aisa o Aotearoa.
Na malama le taeaopo ona usu mai lea o Talivai ma Puna e momoli mai le la fanau i le aoga. Na muamua afe le taavale i Vaivase uta i le mea o iai le fale o le tuafafine o le toeaina, le loomatua o Filo, sei tuu Luama ma tuu a la ato lavalava na ave, ona toe faasaga loa lea o le afi o le pikiapu a Talivai, e agai e momoli si teine o Pina i uta i le kolisi.
Ua faasasao atu nei Luama, na ona sogi atu lava i lona auntie o Filo, ma faasino i ai lana umu na sau ma ia, faasasao loa i le potu ma toe faapau atu i le moega. E lei leva lava ona taoto atu le teine ae gase loa ma lana moe, ma atonu o le malu mai o le savili lea e sau i totonu o faamalama o le la potu, aemaise na umi lava ona feala le teine ma ona matua i le po ua tuanai atu, lea la ua matua mamao ese ai lava ma Samoa le mea lea ua oo i ai le miti a le tamaitai.
O le aoga lea o le moe, aua o lea ua muamua tu laueleele Luama i Niu Sila ma faasolo lana aoga e ala i lana miti lea ua faasolo, a o lei oso i le vaalele e oo moni ai i Aotearoa. Ua miti le teine fai mai ua amata i lana aoga fou, le Kolisi o Aorere i Niu Sila, ma ua sili atu foi ona fiafia i lana aoga fou aemaise o lana uo palagi fou, le teineitiiti o Sandra lea ua la faamasani ma faifai mea faatasi i le aoga.
O le itu e malie ai le miti a Luama lea ua fai, ona e amata mai Niu Sila, ae toe oso faalava ai ma isi tagata o le latou nuu i tua, faasolo ane ai i isi tamaiti o le Kolisi o Samoa lea e maua uma i le meapueata o le miti a Luama.
E foliga sa fiafia lava le tamaitai i lana miti, fai mai ua olo faasolo atoa lana nanu, ae ua amata foi ona iloa e Sandra faaleo nisi upu Samoa, o loo ia aoao i ai. O le vaega mulimuli lava o le miti, na faafuasei ai ona saofai i luga Luama, ona e foliga ua toe faaiu puta le la faigauo ma Sandra ina ua faatoa iloa e le teine palagi, o lea e fai le la faanunumi ma lona tuagane matua, le alii o Ben.
