Poo a foi ni tala na e faalogo mai o ou fai atu i le alii aoao, ia o aga ia a matua, aua o ai se matua le alofa o le a pupula mai lava mata o se isi tagata, ae faaleo atu i ai se inoino? Aemaise, o loo uia mai lava e Pula ala malamalama i mataupu faapenei. Ae o lena ua e iloa lelei o ma agaga moni e pei ona tatou talanoa ai.
“Sauni mo lau aoga i Niu Sila, ma ia tuu atoatoa i ai lou logo ma lou mafaufau. Tuu pea le alii aoao ia, o lea e tumu le sami i i‘a eseese o le vasalaloa. E gata lava i le taimi lenei o lea e fai ma vaai atu ia te oe.
Ae tau umiumi loa ona lilo atu ou foliga, toe amata foi ona maua se isi teine e faaalu i ai faanaunauga o le aoao. Aua nei faamamafaina fua i lou mafaufau faapea, ona o ou matua o faifeau, ona tatau foi lea ona e nofo i se faifeau.
“O se mea lelei pe afai o lou lagona moni lena, ma o se tagata e moni lona alofa ia te oe. Ae o nei aso ua toatele le au ula lea e na ona feoai solo ma tauave le tau o faifeau ma aoao, ae leai se matau moni i le tofi mai le Atua. E tutusa lava lou nofo i se faifeau ma lou nofo i se tama e le faifeau ae alofa moni ia te oe ma matau i le Atua, i le auala e tausi ai lana tautoga o le faaipoipoga.”
E fai lava tala nei a le toeaina, ae ua amata ona tagi lona afafine le teine o Luama. E mafua ona tagi le teine, ona o lea faatoa faalogo atu lava lea o fai mai se manatu o lona tama i le mea ua leva ona faatalatala ai lona mafaufau i le tele o aso, ma o le mea foi lea sa fai ai ma pei e tau toe ave le loto o le teine i le alii o Pula, ona sa mamafa i lona loto nei faapea mai tagata, ‘sei vaaia o le afafine o le faifeau, ae le fia nofo i se faifeau.’
Na uma upu a le toeaina, ona ea ae lea o lona afafine i luga, “Tamā, faafetai lava i le Atua ua ou maua ni matua sili ona alolofa ia te au. Faafetai mo le auala toafilemu na lua faafoe ai lenei mataupu sa pei o se avega mamafa ia te au, ae o lenei ua suiga malie atu lava ma pei e leai se mea na tupu. Na lua faalogo mai o faapea lau tala i le alii aoao, e tuu i le Atua lenei mataupu, ma o le mea moni lena i lou loto. Lea la ua ou sauni ai lava ou te alu i lau aoga, ou te manatu o le mea tonu lea o loo manao le Atua ou te faia muamua i le taimi lenei.”
