Malo le faitau, ae sagai maia, o le toe sosooga lenei o le tatou tala. Manatua, o lea ua le tau lelei le savali a le alii aoao na alu mamao ai i tua i le aiga o le faafeagaiga ma lona faletua.
E ui i lea, o loo maualuga pea le mautinoa o Pula, o Luama lava o lona tofi lea mai le Atua. Lea foi na tautala lava le teine i ana upu i le latou talanoaga, atonu e le o le taimi lenei, ae toe iai lava auala a le Atua e faataunuu ai lana tofiga lenei ua fai.
Na tafafao laititi ai la Pula ma lana talitaliuli, lana tama avetusi o Siaosi, i le aiga o le faifeau, ona toe foi ai loa lea o le la malaga i Apia, ae ua nonofo Luama ma Pina e momoe, sei usu mai ma matua o Luama e momoli mai laua i le taeao e sosoo ai.
E lei faatamala foi le faifeau i se faaoso mo si alii aoao ma lana soatau. Na matua fuli Talivai ma le faletua e teu lelei le aoao, ua atili ai ona faaseseina si alii aoao, e na o sina taimi lava lea o le a faatino ai le musu o Luama, ae o le mea moni lava e toe foi mai lava ia te ia, ona o lea ua faitau e Pula gaoioiga ma foliga fiafia o le ulugalii, e matua la mananao lava ia te ia mo le la tama.
Na tuai lava ona toe fono Talivai ma Puna ma le la tama le tamaitai o Luama, o le lei lilo ese mai o le pikiapu a si aoao mai le latou auala. Na toe valaau ane Talivai i lona afafine e alu atu latou te talanoa i luma, ae tuu teine o le maota e tapena faauma latou mea i le umukuka.
“Faamalo atu afafine mo ou manatu na faaalia,” o upu amata nei a Talivai ma aloalo lona ili e tau faamālū ai ua fai sina vevela o le afiafi. “O lena e te iloa lelei, e ma te le o uunaia lava oe i se mea e te faia ae le o iai lou loto.
