Ua faamaea nei upu a Luama, ua toe oso faalava le faifeau e peiseai o loo tau faamalie i si alii aoao e tusa o le le talia e lona afafine o lona fanoga i lenei taimi. Ae ua faamamafa lava e Talivai le fasi fuaitau o upu a lona afafine faapea “afai lava o le finagalo o le Atua e tatau ona tuufaatasia o ta loto i se olaga faapea i se aso o i luma, e tele auala mamana a le Atua ta te toe fesootai ai.”
E matua nimo i le mafaufau o si tama o Pula, o le loto atoa o Talivai, ia alu atu lona afafine i Niu Sila ma nofo ai e aoga ma faaipoipo ane ai i se papalagi o le a la sue faailoga faatasi i se iunivesite.
Ona toe tautala loa lea o si alii aoao. Leaga foi le tagata e toa! O le mea mautinoa, ua matua masaesae le lagi ma taapeape papa o le finagalo o si alii aoao ina ua le tau lelei lana savali ua leva ona moemiti i ai mo le oo maia o lenei aso, ae sa toe ea ae lava Pula, ua taumafai e ataata malie mai ona foliga i le ulugalii aemaise le la tama lea o loo saofai, ona tulai mai loa lea i luga, ua savali mai i le itu o loo saofai atu ai Luama, ua tu i luma o le teine, ona faaloloa mai lea o lona lima taumatau ia Luama e faatalofa mai, ma sogi mai i le teine.
O le ulugalii lenei ua na o le faataupupula poo le a le uiga o le gaoioiga a Pula lea ua fai. Na maea lea ona saofai ane lea o Pula i le nofoa i autafa o Luama, ma amata loa lana faafetai.
E lei toe tele ni upu a si alii, sei vagana lona faafetai muamua ia Talivai ma Puna i lo la maua o se afafine e uigaese lona tamalii i ona uiga, ma na toe faamamafa lava e le alii aoao, o le isi lea mafuaaga na matua gau ai lona loto e fia mafuta ma avea Luama mana ava, ona e ese mai lava o ia mai isi fanau teine uma sa ia tulimataia.
Peitai na lototele lava Pula e faapea atu, o le a faatali mo se isi tali mai le Atua. Afai e moni Luama o loo tuu i le Atua ana fuafuaga, lona uiga e tatau lava ona iai se isi tali fiafia mo laua i se taimi mulimuli ane, aua o lea foi e tuu atu ana ia talosaga i le Atua. Fai mai si upu faaiu a Pula, “Luama, tau lava ina ia e iloa le mea moni lenei mai lo’u lava gutu, ‘Soo se taimi lava e tau afatia ai lou olaga i ni fatia o le olaga nei, e tulai loa ou foliga i ou luma, e pei lava e fofoe faavi ese atu na faafitauli uma.’”
Ua faaiu le talanoaga a le aiga, ua toe faasolo ane le ipu koko ma le panikeke mafolafola sa tapena e teine o le maota lea sa gasese mai i tua. O le mea lea e pei e tau faateia ai le ulugalii, ona sa iai le la faatalitaliga, ai nei e ese se gaoioiga a Pula lea o le a toe faaali ona ua le talia lona manao.
Ae foliga mai, o lea lava e fiafia si alii aoao, ma manao e tafaofao laititi pea i le aiga, e ui o lea ua fai le tonu, o le a nonofo Luama ma Pina e momoe, ona usu mai lea o le faifeau ma lona faletua e momoli po mai i le aoga.
E tusa o le ta o le itula e 8:00 i lena afiafi ae faatoa faamavae le alii aoao ma lana talitaliuli, le tama o Siaosi, ma toe foi mai loa le la taavale i Apia.
E faia pea
