“Peitai i le faatulagaga o vaega o lou olaga, ou te faamalie atu ai ma ou faamalulu atu i lau susuga Pula, faapea foi ou matua pe afai o le a sala ese sou lagona mai se mea o la manatu i ai, ae o au, e matua le o iai lava sou mafaufau e fia laasia le sitepu lea i le taimi lenei. E pei ona ou taua i le taimi ua fano, o se laasaga lelei, ma ua ou tapena foi i ai, peitai, e iai nisi sitepu ua uma ona ou faatulaga e tatau ona muamua ou laasia, a o lei uai atu lou mafaufau ma lou loto i le faia o sau uo.
“Pula, malie mai lou finagalo, e le o se talitualimaina o lou manao, ae o le Atua lava ia e fai aso. Ma ou te talitonu o se tasi foi lenei o au mataupu o loo tuu atu i au talosaga i le Atua, ma o le mea moni foi lena o loo ou faia i aso uma. Lona uiga, afai lava o le finagalo o le Atua e tatau ona tuufaatasia o ta loto i se olaga faapea i se aso o i luma, e tele auala mamana a le Atua ta te toe fesootai ai.
Ae o lea foi ou te augani au i le Atua i aso uma, e faasino mai le taimi tonu e tatau ai ona ou sagai i le olaga, ma i le taimi nei, ou te mautinoa o le tali lea mai le Atua, e le o sou taimi lenei.”
Ua uma upu nei a le tamaitai i si alii aoao, ona toe sagai ane lea faaleo lana faamalie i ona matua pe afai ua le tutusa sona manatu ma ni o la lagona, e ui o loo iloa lelei e Luama, ua tea mai i tua le lagi i le maualuga o le olioli o lona tama i lana tali lea ua fai.
O le ulugalii foi ia, e le gata i le fiafia i le maumauai o le la tama i lana tali, ae ua matua faateia lava laua i le loloto o le tofa o loo i lenei teine. Emoni lava latou te talanoa i le tele o aso a o lei alu e nofoaoga i Apia, ae la te lei iloa e faapea se gutu poto ma le tamalii o le auala e tautala ai le la tama.
