E ui lava i sau silasila mai Pula ua na o au o se teine talavou, o lea foi faatoa tau amata au aoaoga i le kolisi maualuga, ae o le vaega lenei o lou olaga, ua leva ona fai i ai au tapenapenaga faalemafaufau. Lea foi ou te momoli ai le faafetai i ou matua, aemaise si ou tina i le ma fesagaiga faatina i lana tama teine, ua tele ni ai lelei ua ia faasoa mai ia te au ina ia lelei ona tapena lau malaga i lea itulagi o le olaga o soo se tamaitai talavou.
“O le a le matua autalaina uma atu ou lagona i lenei itu, e ui o se vaega o lou olaga ou te le augata e talanoa i ai. Ae pei lava ona iai foi se isi taimi lau susuga Pula sa faaleo mai ai ou lagona nei ia te au, ma atonu o loo e manatua foi sau tali atu, e faamoemoe o loo e silafia ma manatua ai, o au ou te le fefe e laasia le olaga lea, aua o au o se teine e ola tapenapena ma sauniuni mo soo se galuega taua o le soifuaga.
“Pau lava o lea, e ese foi le auala o loo faatulaga ai au tapenapenaga, ma ou te tatalo o loo malamalama mai foi i ai ou matua, i lenei taimi na matou faafeagai ai. Pula, faapea foi le faafofoga mai a oulua matua, tau ina ia tou malamalama uma lava, e le taitai iai ni ou lagona e fua sau filifiliga i ni tulaga iloga o se tagata.
Pe ana faapea o le itu lena e faamuamua ia te au, semanu o le asō lava ou te faapea atu ai, ua ou malie atoatoa e amata se mafutaga faafaigauo ma lau susuga i le aoao, aua ua atoa ia te oe le tele o nisi o agavaa o loo ou tulimataia i se tasi o le a ou mafuta i ai mo le olaga atoa.
