Faatalofa atu i le toe sosooga o le tatou tala faasolo. Manatua e gata i le vaiaso talu ai, ae o lea ua tau fai sauni uma le ulugalii aemaise si alii aoao o loo faatoai lona fanoga, i se tali mai le tamaitai o Luama.
O le teine na tau amata ona fetoi lona mafaufau pe mata ua tau mai i upu a lona tama ua malie le toeaina e fai se la faigauo ma le alii aoao, peitai o le toe ea ae a Luama i luga ina ua toe fesili faalua mai i ai lona tama e fai atu sana tala, na fetaui lelei ai lava le pupula atu o Luama, ma le faataupupula sao mai i ai o lona tama, o ina na manino lelei ai loa ia Luama, o upu a le toeaina ua na o ni upu e faanofogofie ai lagona o si alii aoao o Pula, ae o lea la e tumau le latou tala ma ona matua, e sauni lanai a malaga i Niu Sila, ae tuu tama Samoa latou e toe saili ni o latou taeao.
Toeititi lava pa le ata a le teine i le malie o lona tama, ae ua matua fuli Luama e faafoliga mai o loo faanoanoa ma tei, ona amata mai loa lea o lana tali. Ua faataga taletale le tamaitai o Luama, ua pei o se tagata ua puea faamanu i ofaga i le talanoaga lea o loo fai, e pei lava na te lei muai iloa, o le auga lea o le malaga mamao mai a si alii o Pula. E tau amata se tala, ona toe mapuea lea ma faatali.
A o si alii o Pula i lea taimi, e mautinoa ua matua fetaui lelei i lona tulaga i lea taimi le uiga o lona suafa, aua o le mea moni, e ui lava i se logo malie o upu a le alii faifeau na faatoa mavae atu ona vagana ai, ae o le mea moni, o lea ua pula atoa foliga o si aoao, ona o le tagata tonu lava e autu i ai lana mataupu, lea ua amata nei ona folifoli atu lana tautalaga.
“Ia, faafetai atu lava mo lenei foi avanoa matagofie ua saunia e le Atua tatou te feiloai faatasi ai, e le gata ma oulua matua, e ui o se feiloaiga e ese mai le tele o taimi tatou te feiloai ai, ae faafetaia lava le Atua aua o feiloaiga lelei nei, e fiafia i ai lo tatou tama i le lagi. O feiloaiga nei e tatau ona faia uma e ana fanau.”
Ua toe nofonofo le teine ma taletale teisi, ae sei tuu se avanoa sei tau seti lelei ai le manava a si alii aoao, i le manaia o sia leo na alu atu. Lilo i manatu o Pula, o lea e teuteu atu le auala mo le taimi e pau ai le pomu mamafa lea ua toe o se aga pau ifo.
“Faafetai foi ua tatou feiloai ma le susuga i le alii faiaoga o le kolisi maualuga, ae tainane foi ni ona mamalu faaletalalelei i lona tofiga aoao. E ui lava ua uma ona momoli atu e le tama o le galuega poo lou tama foi se faafetai i lau susuga Pula e tusa foi o lou faamaauau mai i lenei afiafi ma se mataupu foi na e oo mai ai, ae ou te toe fia molimoli atu foi sau ia faafetai faaleauau, ona o le tatou mafutaga i nei foi aso ua tuanai, ma uiga faatamalii sa e faaalia i taimi uma sa tatou feagai ai i le aoga.
“O aso faapenei ma mataupu faapenei e pei ona e saunoa mai ai, e le o ni aso ma ni mataupu e māmā ia te au. Tailo i nisi alo tamaitai, ae ia te au lava ia, o ni mataupu e taua, lona uiga ou te le taitai ona manao e fai faataaloga pe faia i se auala e peiseai na ona ou faataitai i ai.
