Tauulaula o le alofa vaega 52

Toeitiiti atoa le minute o saofai lava le teine ma punou e aunoa ma se tala. O le toeaina o Talivai i lea taimi, pei ua tau toe faaletonu le toeaina ina nei avea le tele o ana tala ia na fai, e toe feseai ai lagona o lona afafine faapea ai e moni ua fiafia ia Pula. Ua toe oso atu le toeaina, “Afafine, fai mai sau tala ia matou, aemaise si alii aoao ua oo mai nei.

O lena foi ua e faalogologo mai i lona manao. E ui atonu ai ua tuai ona fai mai sau tala, pe ua faateia oe i lenei talanoaga, ia ae o mea lava e tatau ona fai. O lena foi ua e matua, ma e malamalama mai i le agaga o loo i le alii aoao.”

E fai mai uma tala nei a Talivai, ae ua pue lelei atu loa e lona afafine le uiga o lana pupula, aemaise o lea ua fesagai tonu mata o le faifeau ma lona afafine, ae o si alii o Pula o loo punou, e le o iloa mai la, e na o le leo manaia o Talivai lea e lagona, a o mata ua matua tau mai lava ia Luama, aua nei faia lea mea.

Toeititi lava pa le ata a le teine i le malie o lona tama, ae ua matua fuli Luama e faafoliga mai o loo faanoanoa ma tei, ona amata mai loa lea o lana tali.

E faia pea