Tauulaula o le alofa vaega 52

“Pula, o lena ua lava taoso lau uta i le itu faaleagaga. Ua lava lou silafia i le Tusi Paia i le auala e faafoe ai filifiliga nei ua e faia. Ma ua e silafia lelei, o maua o matua, e leotele ni o ma leo i mataupu faapenei, ina ia faamautinoa ua faaui uma atu i fanau le ula o tomai ma mafaufauga tuutuu loloto ia na fafau ae ai foi o matou aiga ina ia fiafia, peitai o le filifiliga mulimuli lava ma le filifiliga mautu, o le mea lena e pau ia te oe, ma le afaine ia maua.

“E pei lava ona ou tau atu i le taimi ua fano, o maua e le o ni matua e faigata i mataupu faapenei, leaga o lea ou te laugaina le upu, e le tatau la ona ou faatinoina foi le upu lena i taimi faapenei.

Na pau le ma faafetai ma le tina, o lou amanaia o maua o matua o Luama, ma o lena foi ua e faafofoga mai, e ma te le tetee i manaoga faapenei o fanau pe a tulai mai. Peitai, a oo loa i le faiga o le filifiliga, o le a tuu atu i le va o oe ma lo ma afafine. Ina nei avea lo ma fiafia e ma te sopoloa ai ma faia se faaiuga mo Luama, ae sei faalogo atu pea poo le a sana tala.”

E fai atu upu nei a le toeaina o Talivai, ae ua amata ona tatavale le loto, nei maoaluma e fai lana faanice ia Pula, ae faalogo mai ua ioe atu i ai lona afafine, ona leiloa lea o se isi ana tala a fai.

Ae ua sasao lava le matua fuli o Talivai e mili faasoloatoa foliga o si alii aoao i ana upu ua see ai lava Pula faapea o lea e manao le faifeau ia la uo ma lona afafine, ma le lilo ia Pula, e matua fuamoa lava ia i le manatu o le toeaina, pau le lagona o Talivai ua tuai na oo mai le aso e alu ai lona afafine i Niu Sila, ina ia aua nei toe iai ni fesootaiga ma le alii aoao.

Lona uiga, na mafua lenei leotele o tala suamalie a le faifeau, aua ua uma ona ia faamautinoa muamua i lona afafine, e le o manao le teine i se faiga uo. Ai ona o le ulugalii o loo nafa ma le galuega faufautua faaleagaga i taimi uma, aua ua atili seetia ai lava si alii aoao, i le vaai atu, oka se toafilemu o foliga o le faletua foi ia. Tusa o le faitau a Pula lea ua iai nei, ua leai se isi mea o toe faaletonu i lana tomaaga, o lea e matua selau pasene mai le mananao o le faifeau ma lona faletua ia te ia.

Tasi lava la sina faafefefefe lea e tau faaletonu ai Pula, o se upu mai le tausala o loo faananau atu nei i ai, lea lava o loo nofonofo ma faapāpā solo ona tamatamailima. Ua uma le tautalaga a le toeina o Talivai, sa tuu foi le avanoa i le tina o le galuega e fai mai sana upu, ae o si fafine e ese le matamuli, ma e lei atoa lava se lima minute o lana ia foi faafetai i le auala ua uia e Pula, ma toe tau laititi mai manatu sa taua e le toeina, ona fai mai loa lea, e sili ia le faalogo atu i se tala mai lo la afafine.