Tauulaula o le alofa vaega 52

E gata la tatou tala i le vaiaso talu ai, o lea faatoa uma lava ona folasia le auga tonu o le malaga atu a le alii aoao, o Pula i le aiga o le faifeau o Talivai ma le fetua ia Puna.

O lea foi la ua maua mai e le toeaina le manaoga o si alii aoao, e fia faauo i lona afafine, ma e tusa lava pe alu i Niu Sila le teine o Luama mo lana aoga, ae ua tautino le alii o Pula, o le a ia faatali lava mo le toe foi mai o le teine.

Ua uma upu a si alii aoao, ona musumusu lea o Talivai i lona toalua, ma vaaia ai le fafine ua savali atu i tua i le potu o loo tapena ai mea a le au kuka, ona toe agai ane lea i le potu malolo, ae ua o ane ma lana tama, le teine o Luama. Na ona vaai mai lava o Talivai ua saofai atu lona afafine i lalo, toe solo tasi loa le afu o le toeaina, ma amata loa ma lana ia foi lauga.

Na muamua lava faapoipoi e le toeaina lo la va nonofo ai o i laua uma o ni auauna a le Atua e ui lava e lei atoatoa lelei Pula i tofiga e pei ona ua iai nei le toeaina o Talivai. Sa momoli foi le faafetai a Talivai ona o auala malamalama o loo ia faatino ai lenei fuafuaga.

“Pula, o le a taatia lava ni ou mamalu faalesoifuaga nei, ma ni ou gafa e tau i le lagi e te tupuga mai ai, ae o le a tatou talanoa i upu faigofie, i le gagana lata mai i le va o matua ma fanau. Ua lagona atu foi e maua nei ma le loomatua lea e nofo mai, se manao foi o i lau susuga e tusa ai ma le afafine nei.