“Leai faafetai, ai lua chips,” o si tala lea a si alii ave taavale. Ua faataga ataata Luama ma faafetai ia Pina, ona faasolo loa lea o le chips. O le mea malie lea ua tupu, ua uma le saofai faasasao o Luama e pei ona amata mai ai le latou malaga, ae o lea ua amata ona faasasasasa i le itu o iai Pina, ae u le patua ia Pula.
Ua alu pea le malaga a si vaega lea, ma o le tea laititi o le itula e 4:00 ae amata loa ona vaaia fale o le pitonuu lea o loo tausi nuu ai le susuga i le faafeagaiga ma lona faletua.
Ua afeafe atu le taavale i totonu o le malae tele a le aulotu lea e tu mai ai i le pito i tua le maota o le faafeagaiga, ma o le taimi lea i le mafaufau o Luama, ua tuai ona tu le taavale sei oso i lalo ua fai lava sina omia i lana saofai lea faaautafa ai i totonu.
Na iloa mamao mai e le toeaina o Talivai le afe atu o le taavale, ona tulai lea ma savali mai ua tu i luma o le faitotoa o lona fale, ma matai lelei mai le malaga lea o loo agai atu.
E tasi lava le mea lea e tulimatai mai e le faifeau, poo fea le pito o le taavale o loo saofai atu ai lona afafine. Ma e lei nenefu lava le silasila a le toeaina i lona iloa lelei mai o lona afafine lea e ogatotonu, o se vaaiga e lei fiafia i ai Talivai.
E faia pea
