E lei tali le teine, ae na o le faasagasaga lava i fafo ma talotalo ua tuai tele ona toe foi ane Siaosi ma Pina i le taavale sei toe amata le latou malaga.
Ua vevesi lava le mafaufau o Luama i lea taimi, na amata o tau lagona le tiga alofa ia Pula, ae o lea foi ua faafuasei ona oso lona inoino, o lea lava o le a taumafai lava le alii aoao e faatatope uma ana fuafuaga mo ia, ona alu ane lea i Niu Sila, ae peiseai o se tagata ua alu saisaitia.
Ua toe faliu mai nei le teine, “E leai se mea e afaina ai lou alu e te talanoa i ou matua. Ou te le iloa foi poo le a se lagona o ou matua o iai, ae pei lava ona ou tusi atu i lau tusi lena na momoli atu e Pina, e le faigofie ia te au ona fai sau uo i le taimi nei, a o ou taumafai e fai lau aoga, aemaise o lea o le a ou alu atu i le la atunuu ou te le masani ai, ina nei taufai saputu uma mai nei mea tetele i le taimi e tasi, ona avea lea ma itu e faigata ma lavelave ai lou olaga.
“Ou te iloa o oe o se alii lelei Pula, ua tele foi aso o ta masani ma ou iloa nisi o uiga lelei e te faaalia, lona uiga o lou teena o sou manao, e le mafua ona o oe o se tagata leaga, ae o lea ou te mafaufau mamafa i le taimi ma le faagasologa o lou olaga. Ae pule lava oe ma sou manao o fia faailoa i ou matua, ou te le taofia lena itu. Ou te le iloa foi poo le a se mafaufau i ai o ou matua.”
Atonu o loo puepue maua lelei mai e le alii aoao le itulagi lea e agai i ai faamatalaga a le teine, aua e uma ane lava tala nei a Luama, ae ua toe saofai lelei foi Pula, ua faamamulu lemu ifo lava lima ia sa ia uumauina.
E fetaui foi le uma o tala a Luama, ae savavali ai foi ma le faatauga a Pina ma Siaosi lea na o i le faleoloa. O lea ua oso mai lava i luga Pina, ae foliga ua galo nimo ia Luama lana faatau lea na fia fai, e oo foi ia Pula, ua leai lava toe faamanatu i le teine lana faatau.
Ua le iloa ia Pula pe aisea ua le toe faia mai ai sana tala e tali mai ia Luama, pe ona ua oo ane Pina, pe ua fetaui lava foi ma le tau tiga o lona loto, ona o lea lava e le o faigofie ona seu atu le loto o le tamaitai i lona fanoga. Ua na ona faaola lava o le taavale, ma toe amata loa le faiga malaga.
E saofai fua Pina, ae pei ua tau le toa ona lagona, ona e foliga e iai sina mea lea na tupu i le taavale i le toalua lea na faamuli atu, aua o lea ua tei lava ua faaola le leoa le taavale ma amata le faiga malaga, ae ua leai lava se isi e toe tautala. Ua taumafai nei Pina e faapisa le latou nofoa. Ua tatala le pepa chips ona pasi mai lea ia Luama, ma fai mai i ai e share le la chips ma Pula.
