“Ua e sauni i lau malaga i Niu Sila?” o si fesili tau le lagona lea a Pula. “Ia, lea lava ua tau sauni atu i ai,” o si tali puupuu lea a Luama na toe sosoo mai loa le isi fasi tala a Pula, “ailoga a e toe fia manatua mai matou pe a e alu, a ea? Se aso e alu atu lua uo ma se tama palagi o le a lua aooga i Niu Sila.”
Na ataata Luama e pei o lona mafaufau ua na o se tala e faaita ai o ia e Pula. “Ia a oso lava fai lena uo, e lei iloa pe mata e umi ona ou gafatia le tau malulu o le atunuu. Na ou fai i ou matua, afai ou te alu atu e faigata ia te au le tau o le atunuu, lona uiga e uma loa lou tausaga muamua ou toe sau loa. Ma ua malilie foi i ai ou matua.”
E fai tala nei a Luama, ae o loo faataupupula lava i ai Pula, ae o le lima lea na uu ai le tualima o Luama, ua amata lava ona faasolosolo ae i luga, ma na lagona lelei e Luama, o lea e foliga o loo tosotoso lemu atu e Pula o ia e taufaapipii atu ia te ia.
E lei teena e Luama le mea lea e fai ane e Pula, seia oo lava ina faafuasei ona lagona e le teine, ua sii ae e Pula ona lima uma e lua i luga, ma faifai lemu lava ona sogi faasolosolo i ai. Ua lia tino o le teine, ma na iloa lava e Pula le le toafilemu o Luama i lana mea lea ua fai, ona ia toe tuu ifo lea o lima o le teine i lalo, ae o loo mau ai pea lana uu.
“Luama, e te iloa, o lea ou te alu atu e talanoa i ou matua, pe malilie i se avanoa sei ou faamasani atili ai ia te oe. Ua ou iloa o le a e alu, ae e malosi lou talitonuga, poo a lava ni nai aso itiiti o totoe, afai e talia e ou matua lau talosaga, aemaise foi oe ma sou lagona, fai mai le Tusi Paia, e tutusa le aso e tasi ma tausaga e afe. E mafai e se vaiaso e tasi pe lua o totoe, ona sunui loloto ai seia oo ina mauaa se fatu, e olaola pea seia oo lava ina fua taufuifui mai i se aso.”
