Faatalofa atu i le toe sosooina foi lenei o le tatou fagogo. Manatua foi o lea ua agai atu nei le malaga a le alii aoao ma le au tamaitai o Luama ma Pina, e agai i le aiga o Luama.
E ui lava o lea e silafia lelei e le alii aoao le mafuaaga o lana malaga i matua o Luama, ae ona o le naunau lava ma le le toa i tei ua fofola atu ona manao e le talia e le toeaina o Talivai, lea la e mafaufau ai lava Pula, e tatau lava ona iai sina avanoa o le latou malaga lenei, e tau fai atu ai nisi ana gaoioiga ia Luama, atonu e tau gau mai ai le loto o le teine ia te ia, a o lei oo le taavale i tua i le aiga o le teine.
O lea ua tu le taavale ma tuli e Pula lana avefeau o Siaosi, i le faleoloa e faatau mai ni latou apainu ma ni sanuisi. E lei oo lelei Siaosi i le faleoloa, ae manatua foi e Pina, e iai se mea na ia manao e faatau mo lona tina, ona ua galo ona faatau mai Apia. Manatua o lea sa fai le tonu a le au tamaitai lenei, ia aua lava nei alu ese le isi o laua aemaise lava Pina, ae aua nei tuua na o Luama ma Pula i le taavale.
Peitai ua le popole tele Pina i lea tonu, ina ua toe tau lona mafaufau i le suiga lea na toe fai e Luama i le latou nonofo ai i totonu o le pikiapu a Pula, faapea loa lona manatu, ‘ai foi la ua okay lau ia alu e faatau.’ Oso loa i fafo ma Pina ma laa i le faleoloa, ae tuu ai nei na o Pula ma Luama i le taavale.
Ua tei Luama i le gaioiga a Pina lea ua fai, ma ua le mautonu ai nei lona loto, ona faafuasei lava lea ona taumafai e mafaufau se mea e oso ai ma ia i fafo, ae o loo faitau uma lava e Pula foliga le mautonu nei o le teine.
“Sei ou alu e faatau mai se mea lea ma si ou tina manu ua tu le taavale,” e tau mei loa Luama i le itu o le faitotoa e tau tatala, ae ona faalogoina le papai atu o le lima o Pula i lona tauau, ‘se aua e te alu, nofo mai ta talanoa ma faatali le vaega le la, sei sau Siaosi ona toe tuli lea e fai mai lau faatau, ae nofo mai ta talatalanoa.’
Ua faliu mai Luama ma tilotilo ia Pula, ma na ia vaaia ai foliga o se tagata o loo lilofia atoa i foliga o le mafatia, e ui o lea e peiseai o loo ataata atu ia te ia. Ua faafuasei ai lava ona toe suia atoa lagona o Luama, ona toe ata lea ma toe soso mai i totonu.
O le mafaufau o Pula, o le paganoa tonu lenei mo ia e tope atu ai nisi ana taga manu lava o lea ua tau gau mai i lalo le tamaitai faigata.
“Luama, e mafai ona ou uuina lou lima ma ta talanoa?” E lei tali le teine, na o le saofai ma tilotilo i tagata o loo gasolo i le faleoloa, ona toe tepa lea ia Pula, ma tuu atu loa i ai lona lima agavale ona opo mau lea e Pula. Na lagona lelei e Luama le maluluina o lima o Pula, ma o loo susu foi e foliga o lea e afu malulu le alii aoao.
