“Leai aua e te popole, o lea foi ua amata ona toe mei i totonu tino o nai teine,” o le tali atu lea a Pina ma amata lava ona faafua le oso muamua i totonu. Na iloa lelei atu i siumata o Luama le pupula le fiafia mai o Pula i le mea lea o le a tupu, e foliga o Pina lea o le a muamua oso atu i totonu e pito atu ia te ia.
Ua mafaufau Luama, o le mea moni lava ua gau atoa le plan a Pula lea na alu ane ma ia, ma ua faafuasei ai lava ona toe feteenai solo mafaufauga o le teine, e peiseai ua oso faafuasei lona alofa i le alii aoao, ma le tele o le taimi lea sa faatalitali fiafia ai mo le latou malaga, ae o lenei o le a toe o atu faanoanoa lava i tua. O le isi itu ua vave ona oso i ai le mafaufau o Luama, i avea le faanoanoa pe ita foi Pula i le latou malaga, i faaletonu ai le uliina o le taavale.
“Ia sei ou oso muamua atu la i totonu e lelei ou te paee, ona oso mai loa lea o Pina, ae tapuni mai ai e oe Siaosi le ma faitotoa, faamolemole lava.” O Pina lenei ua fai sina tei i le tonu a Luama lea ua toe sui faafuasei mai le la tonu na fai lelei i le po.
O loo taumafai Pina e faataupupula mai ia Luama, ae ua oso gugu lava le teine i totonu, foliga foi o lea e taumafai e alofia le toe tilotilo atu ia Pina. Ua leai se isi e toe tautala, ae na saofafai lelei loa teine i totonu, tapuni loa e le auauna le faitotoa, ae oso ae o ia i tua.
