E ui lava ina maatiati mai le malulu i le taeao segisegi o le Aso Faraile, 29 o Aperila, ae sa lei alo tamala pe faafiti le Isaraelu moni i le osiga o aiga faapea le tautua nuu e soosoo tau‘au e lagolago le faamoemoe. Na faatumulia i le mamalu o Tumua ma Pule faapea malo faaaloalogia ma le Matagaluega EFKS ma nisi o tovine.
O le Toeaina Faatonu ia Kerita o se lupe faalele mai Lepā ma Matatufu Lotofaga, faapea le faletua ia Binary mai le alalafaga o Malie.
Na amata galulue le konekarate e fausia le Malu o le Atua ma le maota o le galuega i le aso 1 Oketopa o le tausaga 2010.
Ua leva ona mae‘a le hall a le ekalesia lea sa fai ma fale lotu i tausaga e tele ma o le taimi nei ua atoa tino o Vaatausili auā ua lē gata ua mautu le hall ua igoa o le Meleniuma Hall, toe mae‘a le malumalu tapuai o le Atua ma le maota o le Toeaina ma le faletua faapea le ka paka e lē faatusalia le telē.
E 31 matafale a le aulotu i le taimi nei e aofia ai ma le Toeaina Faatonu ma le faletua a le Ekalesia EFKS Ipwich. O nisi o malo faaaloalogia e aofia ai le taitaifono o le Ekalesia Aoao mai Samoa, Rev Tavita ma le faletua ia Tailua Roma, Toeaina Faatonu mai Lepā, Suafa‘i ma Naomi Pātū faapea le aumalaga mamalu a le alalafaga.
O isi malo faaaloalogia e aofia ai le Toeaina Faatonu mai Niu Sa-Uelese, susuga ia Rev Peleti ma le faletua ia Senetenari Toailoa, Toeaina ia Rev Simeona ma le faletua ia Alofa Taefu o le pulega EFKS Sini Sisifo faapea le susuga i le faafeagaiga ia Uikilifi ma le faletua ia Sherry Vaifale ma le Ekalesia EFKS a Rooty Hill.
E sili atu i le 13 taalolo sa fai sao i le Aso Faraile. I le tulaga o popese o le aufaipese mai Pine Rivers ma le Pulega a Matu le toeaina ia Rev Lauie Lupematasila ma le faletua (Rev Tapenaga & Olita Reupena) na tulaga muamua.
O le aufaipese EFKS Purisipeni (Rev Milo & Talamasinei Faaleava, aufaipese a Ipswich Central (Rev Aofaiga & Lolo‘u Lev) faapea le sao tāua o le Puleaga Katoliko a Kuiniselani, afioga ia Patele Epati Tamati. Na faatumulia lea aso, i le matagofie o le taupati mai o nei aufaipese, ua matagofie ai le faamoemoe o le Toeaina Faatonu ma le Ekalesia. Sa faaalia le matagofie o le lima foai o aulotu i lea lava aso, e ala ia latou taalolo ma meaalofa tupe.
O le Aso Toonai, aso 30 Aperila, 2011, na amataina ai le sauniga lotu i le 10 ile taeao. O le taitai o le sauniga o le Toeaina o le pulega i Matu, le susuga ia Lauie Lupematasila. O lē sa fofogaina le faitauina o le Tusi Paia o le susuga i le Failautusi o le pulega i Sisifo, le susuga ia Lance Tautiepa. O lē sa molia talosaga o le afioga i le Sea o le faasinoti a Kuiniselani le susuga ia Sofā Mulipola.
O le lauga o le sauniga sa fofogaina e le susuga i le Taitaifono o le EFKS le susuga i le Toeaina Faatonu Tavita Roma (afioaga o le EFKS Salailua i Savaii). Ona saunoa faaopoopo ai lea o le susuga i le Toeaina o Lauiea Lupematasila, i lana faamalosiau mo le ekalesia. O le afioga ia Patele Epati, sa faaiuina le sauniga, i le tatalo faamanuia.
O le susuga lava i le Toeaina Faatonu Kerita Reupena, o ia lea sa ia saunoa i le tala o le Galuega. Ma o le saunoaga a le toeaina faatonu, o se saunoaga e faamalosiau uma mo tagata tautua lotu. Sa faatāuaina i le saunoaga a le Toeaina Kerita Reupena, e matautia le alofa o le Atua i lenei galuega, ona o se galuega e tau faasoasoa lona faaaogāina o tupe, auā ua lē toe taugofie le soifuaga nei. Peitai o le mea e lē oo i ai le malosi o le tagata, o inā e faaauau ai le mana lilo o le Atua. E leitioa foi a faaigoaina le falesa, o le ALOFA TUNOA O LE ATUA II auā ua vaaia e le ekalesia le maoae o lona alofa ua mafai ai ona faaumaina le galuega ma le fiafia.
O le tele o vaega o le galuega, e faatinoina lava e le aulotu. E pei o le faatotogaina o le maota tapuai, na saunia lava e alo ma fanau o le ekalesia, pulelaa, laulau faamanatuga, laulau o folafolaga faatasi ai ma le laulau o le papatisoga, ma le tele o isi totoga o le falesa na saunia ma fesoasoani i ai le aulotu.
Na mae‘a le sauniga ona faagasolo lea o le maimoaga i le falesa, faatasi ai ma le fale o le galuega. Na faaiu i faaaloaloga e pei ona masani ai Samoa i aso tetele faapenei. Ma sa faapea ona faatofusia le mamalu o le atunuu na potopoto i lea aso, aemaise ai le paia o le aufaigaluega i faaaloaloga maualuluga.
O le tau aofai o le galuega e tusa ma le tasi le miliona lua selau onosefulu afe talā ($1,260,000) e aofia ai le Malumalu o le Atua, maota o le galuega, o le ka paka faapea pa puipui o loo sioina ai le fanua atoa. E toluselau sefulu afe $310,000 le seleni na amataina ai le galuega ona o le naunautaiga o le Ekalesia ma le tautua lotu ma le silasila i le Atua ma Lona finagalo.
E limasefulu afe tala ($50,000) na tuuina mai i le Toomaga a le Ekalesia Aoao i Samoa. O tupe mamā ia na amataina ai le galuega.
Na tuuina mai le ivaselau afe tala ($900,000) mai le Pabtist Church. O le aotelega o le aao foai i le faamoemoe o le Toeaina ma le faletua faapea le Ekalesia EFKS Ipswich, na faamaopoopoina ai le seleni paia e tusa ma le lima selau fitusefulu afe talā ($570,000).
E lē o mapu lava le solo mai o le aao foai o le atunuu, alalafaga ma afioaga ma Ekalesia eseese faapea tauaiga ona o le fia soosoo tau‘au ma fesoasoani, atonu e sili atu se isi faasiliga e toe maua mai ina ua mae‘a le faamoemoe. Viia le Atua!
Sa vaaia le faatasi mai o le Atua i le faamoemoe ua iu ai mea uma i le manuia, ae foi ai le viiga ia te ia. Faamanuia le Atua i le susuga i le Toeaina Faatonu Rev Kerita ma le faletua ia Binary Reupena ma le paia i le Ekalesia malosi EFKS Ipswich.
