Tautua ofo fua mo le atunuu – “Le Aute Gas”

O le tautuaina o le atunuu e ala i le kiliva sa‘o atu o fagu kesi mo gasesega i maota ma laoa, o le auaunaga fou lea a se tasi o Kamupani o “Le Aute Gas.” O lea auaunaga o le a avea ma faamāmā avega i le mamalu o le atunuu, aemaise lava i aiga o loo nuu i tua.
O le auaunaga fou lea a lea kamupani, e pei ona faalauiloa i le taeao o le Aso Lulu, 10 Iulai 2013 i lona ofisa i Taufusi.
O le tautua e ofoina fua mo le mamalu o le atunuu e pei ona saunoa le Susuga i le alii Murray Betham. “E na o le resitala lava o lou suafa, ona faitalia lea o matou ma kiliva atu le tou fagu kesi.”
O lea auaunaga e pei ona saunoa Murray, o loo taumafai ina ia sopoia atoa Upolu, aemaise o se auaunaga e mo le motu i Salafai.
I le feiloaiga ma le vasega o tusitala ma le aufaasalalau na saunoa ai Murray e faapea, ua leva ona fuafua lea auaunaga, ona e manatu le kamupani i le faigata o tulaga o femalagaiga mai nuu i tua i le taulaga e faatau fagu kesi auā gasesega a aiga.
E lē gata i lea, o se fesoasoani tuusa‘o mo aiga e aunoa ma se totogi, ina ia faigofie ma taugofie mo aiga uma o Samoa. Peitai, o lea ua faafaigofie e Le Aute Gas, le momoli sa‘o atu o le fagu kesi i maota ma laoa, i soo se taimi e moomia ai. Ua mae‘a foi ona faatautaia se sailiga a le kamupani ma silafia ai le tele o le fagu kesi o loo tele ina moomia e aiga, ona e umi lona faaaogāina.
O lea na manatu ai loa le kamupani o le a faatautaia le latou auaunaga, e kiliva fua ai fagu kesi e 9kg mo aiga o loo moomia. Na saunoa foi Murray i le uiga o le igoa ua faaigoaina ai le kamupani, ina ne‘i fesiligia le kamupani i le uiga o le igoa.
O le pogai o le faaigoaina o le kamupani i Le Aute e pei ona saunoa Murray, e manatua ai lona tuaa (grandmother) ia Ota Afamasaga ua fai i lagi le folauga. O le manatua ai pea o le tuaa o le susuga ia Murray o le ala lea o le faaigoa o le kamupani i Le Aute. Ua faailoa mai foi e le susuga ia Murray o le a faaoo foi lea auaunaga mo le motu i Salafai i se aso o i luma.
O le Kamupani a le Supa Gas i Niu Sila o loo galulue soosootau‘au ma Le Aute auā le faatauina mai o lea fagu kesi. Ua tuuina mai ai foi ma le avanoa e le Kamupani mo soo se tasi e fia malamalama atili i le auaunaga o le a faatinoina, e mafai ona susū sa‘o i le latou ofisa autū i Taufusi faafesagai ma le Faleaiga a le Georgie’s Pizza.