Tautua fesootai a le Digicel i faailoga mo taaloga ma le Asosi o le PIPA

O le tautua faifai pea a le Digicel, e ala i auala o fesootaiga, ua lē gata la latou auaunaga faapitoa i fesootaiga faatinoina i luga o telefoni feaveai. E tele nisi o fesoasoani eseese o loo taulamua ai le  tautua a lenei kamupani. E pei o lo latou sao o loo faatinoina e ala lea i faailoga ma pine faamau taualoa i le tele o taaloga ma faagatama e pei o le lakapi, aemaise o faailoga e fitoitonu ma faamanuiaina ai alo o le Pasefika.
O le tasi o nei faailoga taualoa a le Digicel o loo faaauau pea ona ave i ai la latou lagolago malosi o le ‘Digicel Pacific Island Player of the Year Award’, mo se tamafanau a le Pasefika e tulaga ese ma mataina lana taalo, pe ‘aisilia foi i lana faagatama, ma e siilima i ai le toatele o i latou e palotaina suafa mo nei faailoga. E taitasi i le tausaga ona tauaaoina lenei faailoga; ma o le tausaga lenei, o se tasi o alii taalo lakapi mai Tonga, le alii o Nili Latu sa ona mauaina lenei faailoga taualoa.
O se faamanuiaga sautualua lea mo le alii lenei o Latu, ona e lē gata i le faailoga lea o loo lagolagoina e le Digicel, ae sa ia mauaina foi le faailoga o le ‘Tongan Player of the Year Award’ o loo faatinoina ma lagolagoina malosi e le Asosi a le PIPA (Pacific Island Players Association).
O le susuga ia Jack Lam, o loo taalo i le Hurricanes na tauaao i ai le Samoan Player of the Year Award, ma le alii Fiti o Akapusi Qera, o loo taalo i le Kalapu lakapi mai Farani a le Toulouse, sa ia mauaina le Fijian Player of the Year Award.
O nei alii uma sa taaalo i le tulaga o le laina i tua (flanker) a aulakapi o loo taaalo ai, ma o se tasi o tulaga e pito i sili ona mafuli i ai le mamafa o pasipasiga ma le puipuiga o le polo i taimi faatino o nei faagatama. Faaalia lagona faafetai o se tasi foi o alii taalo iloga aemaise i taaloga a le Manu Samoa, le susuga ia Seilala Mapusua faapea ma Deacon Manu, se tasi o alii taalo mai Fiti – ma o i laua foi o nisi o sui na latou faavaeina le PIPA – ona o tulaga ua faapea ona amanaiaina ai le sao o alo ma tamafanau Pasefika, ona o taumafaiga a le PIPA.
E lē gata i lea ae ua faafetaia foi le lagolagosua malosi a le tautua mo fesootaiga a le Digicel, ona ua lē gata i lana auaunaga masani, ae ua faaalia lo latou talisapaia o taumafaiga a alo Pasefika i lenei faagatama. Sa tali fuaitau le tamaitai o Katie Taylor o loo faauluulu i ai tulaga o le Maketiina o auaunaga a le Digicel i le Pasefika (Digicel Pacific Head of Marketing) ma faaalia ai foi lo latou agaga faafetai ona o le avanoa ua tuuina atu e le PIPA e latou te lagolagoina ai lenei faailoga tāua, o loo faatinoina i le mamanu o le tanoa ‘ava. Ua silia nei ma le 12 tausaga o tautua pea le Digicel i ana fesootaiga i telefoni feavea‘i ua soo ai atulau o le Vasa Pasefika, ma faafaigofie ai ona militino ma soo se tasi i auala faatekonolosi faaonapo nei.

Nili Latu, na maua le faailoga taualoa a le Digicel mo le ‘Tongan Player of the Year Award’ - Photo: dailytelegraph.com.au