Mai ia Iutita Rusk, Pacific Quit Smoking Service Project Manager, Auckland Regional Public Health Service
O le aso 31 o Me ua faatāuaina i le lalolagi atoa e taofi ai le ulaula tapaa (World Smokefree Day), o le ala lea ua fiafia ai Jerry e faasoa mai lana tautinoga mo i tatou, ma lona faamoemoe, ia talosia e unaia ai isi tagata ulaula e faataitai nei loa ona tuu.
O Jerry, o se tamā Samoa ua fai fanau a lana fanau, ma e tusa ma le 20 tausaga o ulaula lenei tamā a o ia lei taofia.
O se faamatalaga lenei a Jerry: “Na amata ona ou fiafia e ulaula ina ua ou taunuu mai i Niu Sila ma ua amata ona ou alu ma tafao i patī. E iai taimi sa ou taumafai ai e tuu, ae fai lava ma ou toe foi i la‘u masaniga. Ina ua fai mai si a‘u fanauiti, o fanau a la‘u fanau, ‘Faamolemole Papa, tuu loa lau ulaula’ o inā na pei e taia ai lo‘u mafaufau. Aemaise foi ua ou lagona ua ou matua, ma ua ou manao ia umi pea ona ou ola malosi mo lo‘u aiga.
O lea la, ina ua faasolo atu le polokalame a le Pacific Quit Smoking Service i le matou falefaigaluega, na ou manatu ai o le a toe taumafai tasi e tuu. Na telē se fesoasoani a faamatalaga ma faamalosiauga na ou maua mai le vaega a le Pacific a o latou asiasi atu i vaiaso taitasi, aemaise foi pululole ma mea e faapipii i le tino sa tufa fua atu.”
Sa auai foi Jerry i se kulupu na latou maua ni fesoasoani e taofi ai le ulaula tapaa, ma sa ia iloa na aogā ia te ia le faalogologo atu a o faamatala mai foi a latou tautinoga.
Fai mai Jerry: “Ua fitu nei masina talu ona tuu la‘u ulaula, ma e iai lava taimi e faigata ai ona tetee atu aemaise pe afai o loo matou iai faatasi ma nisi e ulaula. Ae e tau lava lo‘u mafaufau i si a‘u fanau ma lo‘u aiga, i le vaai atu ua matuā fiafia i lenei taimi ma o loo latou fesoasoani mai pea ina ia tumau pea ona ou lē toe tago i se tapaa.
E lē gata i lea, o lea ua mafai ona ou sefeina se $50 i le vaiaso, o se tupe sa masani ona alu i a‘u sikaleti, ae o lea o le a mafai ona faalava ai o matou pasese i le matou malaga i Samoa. Ua toe faatupulia atili lo‘u malosi ma ua ou lagona ai le fiafia. O lenei la ua ou lē toe pa‘i i se tapaa, o le ala foi lea o lo‘u fiafia e faasoa atu la‘u tautinoga mo uo uma o loo ulaula pea, ina ia unaia ai i latou e taofi nei loa.”
O le filifiliga e tuu loa le ulaula, e fai e le tagata e alofa i lona aiga. (Quit Now It’s About Whanau), o le ‘au‘au lena o le aso faapitoa i lenei tausaga mo le taofia o le ulaula tapaa (World Smokefree Day) i le aso 31 o Me.
O se avanoa sili ona lelei lea e faamanatu ai le aso o le a taofi ai lau ulaula. A fia maua nisi faamatalaga e uiga i le Pacific Quit Smoking Service (mo tagata o loo alala ma pāpāaao i Waitemata ma Aukilani) saili iinei:
http://www.arphs.govt.nz/health-information/alcohol-tobacco/arphs-smokefree poo le telefoni 0800 867848.
