O tala salatua poo tala lealea i le matagi e mafai ona avea ma ni tala e moni. Peitai o tala faapea e mafuli lava ina lē talitonuina ona o le talitonuga o ni tala faatupu poo ni tala foi e saveu ai le filemu i totonu o le mafutaga.
O le fono a le Palemene ua mavae atu nei i lena masina o Ianuari sa faalava ane ai le faipule o Alataua i Sisifo i le taimi o felafolafoaiga o le tala faaopoopo o le tupe ua pasia, ma ia faailoa i le maota fono ua faamavae le afioga Levaopolo Talatonu ma le Tautua Samoa.
Na sosoo ma se lipoti a le upega tafailagi o le Talamua na tusia e le tamaitai tusitala o Lagi Keresoma na faailoa ai le faamaonia o lea tulaga, i le tuuina atu o le faamavaega a Levaopolo i se fono a le latou faafaletui, peitai sa teena e pei ona ta‘ua i le lipoti.
Ina ua maua le avanoa o le tusitala o le Samoa Times i le fono a le Tautua Samoa ma tusitala i le Aso Tofi ua mavae, na tuusa‘o ai sana fesili i le taitai le afioga Palusalue Faapo II.
“E lē sa‘o lena lipoti ma e sese foi na tala ua tou faalogo i ai”. Na aumai ai ma se finagalo o Palusalue e faasino i le faipule o Alataua i Sisifo le tofa Lafaitele Patrick Leiataualesa e faapea, na pau lava lea o le minisita lagolago na oo i ai le tolaulauga a le Palemia i le faalauiloaina o minisita lagolago, na o le faapea mai lava o le Palemia o le minisita lagolago o le faletupe tutotonu e aunoa ma le tolaulauina o lona talaaga poo lona profile.
“O iina e ta‘u mai ai ia tatou le ituaiga tagata e iai le faipule lena, ma lana lafoga na fai i le Palemene”. E lei maua le faipule o Alataua i sisifo mo sona finagalo. O le fono a tusitala ma le Tautua Samoa na avanoa ai ma ni fesili i le afioga Levaopolo ina ua ulufale atu i le potu o le maota o faipule le Tofilau Eti Alesana i Mulinuu ae o le a mae‘a le feiloaiga a le latou vaega faaupufai ma le au faasalalau. Na talia e le alii faipule le talosaga e aumai sona finagalo i le mataupu ona o lea ua fetaui lona taunuu atu ma le avanoa ai o se fesili i le taitai o le latou vaega.
E tasi lava le tali mai a Levaopolo e sese lafoga na faia e le faipule o Alataua i Sisifo, ma o ia o loo tumau pea lona avea ma sui o le Tautua Samoa. Na aumai ai ma sona finagalo i le autusitala i lona lagolagoina o le tulafono tau faaofi e faatu ai se fono faatonu mo le aufaasalalau ma tusitala, ina ia mafai ona foia ai faaletonu i le pitolaau a le aufaasalalau o le lipoti o ni mataupu e leai se moni.
O le feiloaiga a le alii Palemia ma nisi o tusitala i le Aso Tofi lava na tea nei, na fesiligia ai foi pe moni ua avea Levaopolo ma sui o le HRPP. Na tali Tuilaepa e lē moni auā o aiaiga o tulafono o iai nei e faasino i vaega faaupufai, e lē o mafai ona tupu ai se mea faapea, seiloga lava ua mae‘a se paeaiga ma faata‘ape le nofoaiga faapalemene.
O le taimi tonu lea e faia ai le filifiliga a le tagata i se pati faaupufai e fia lagolago i ai pe afai o loo fuafua e tauva i tofi faipule o itumalo i le Palemene.
