Ta‘utino le Pelesetene e leai ni faiga faavae a le ekalesia e faasā ai ona faaaogā gagana a isi atunuu ia latou tapuaiga

Ua tutu aai le Pelesetene o le ekalesia a Iesu a Keriso o le Au Paia o Aso e Gata ai i le Pasefika o James J Hamula i le faapea mai e lē moni lipoti na masua mai ai ni faamatalaga e faapea o loo tapu le faaaogāina o le gagana Samoa e se vaega o tagata lotu o le ekalesia i Brisbane Ausetalia.
E manino mai i le finagalo o le alii pelesetene i se feiloaiga ma tusitala i Samoa, le leai o se faaiuga faapea a le ekalesia, ae ua na o se fetuunaiga na faia e faaaogā ai le gagana Peretania i le faatasia o tagata lotu Samoa, Tonga ma isi atunuu i lalo o le uarota e tasi e fulisia i ai i latou e tautatala i le gagana peretania ae e iai le faaliliuupu mo le faasamoaina o sauniga ma polokalame fai a le ekalesia.
Ua ta‘utino mai foi le alii pelesetene e leai, leai lava ni faiga faavae ma ni faaiuga a le ekalesia e tapu ai pe faasā ona faaaogā gagana a isi atunuu ia latou tapuaiga ae na o le igilisi (English language).
Na tuai ona aumai se finagalo o le ekalesia i le mataupu ona na faaalia e se tasi o taitai o le ekalesia i Samoa le susuga Meliula Fata sa lē mananao e vave faia lea tulaga ona sa mataitu pea poo fea tonu o loo agai mai ai atugaluga.
Ina ua toe salalau lipoti i le vaiaso na sosoo ai na faaalia e Meliula na faafuasei ona avatu se faatonuga a le pulega o le ekalesia e malaga ma nisi o sui sinia e vaai pe moni. Na malaga i Brisbane ma faapea ona agai ai sui o le aumalaga e toalima i aulotu eseese o loo lolotu ai tagata Samoa ma latou iloa ai, e lē moni tuua‘iga.
Na faaalia e se tasi o le aumalaga o ia sa lotu i le aulotu o loo mapuna mai ai tuua‘iga, ma sa ia iloa ai e moni lava o loo faia sauniga uma i le gagana peretania ae o loo iai le faaliliu upu poo le translator, ma e lē o faasāina foi ona faaaogā le gagana Samoa.
Na faamatala le alii pelesetene i le feiloaiga ma tusitala i Samoa ma ia faailoa ai le faaiuga a le faamasinoga i le tausaga e 2007 e faasino lava i le mataupu a se vaega o tagata Samoa i Brisbane o sui o le ekalesia.
Fai mai Pelesetene Hamula e faapea talu ai o se vaega o tagata Samoa, tagata Tonga ma tagata Fiti o loo lolotu ai i le uarota na faia ai le iuga a le faamasinoga e tuufaatasia uma i latou ona tapuai faatasi lea ae faaaogā le gagana peretania.
O le manatu o le pelesetene atonu o le lē malamalama o tagata Samoa i le faauigaina o le faaiuga a le faamasinoga na mafua ai ona alia‘e o latou lagona lē fiafia ma faapea mai ua tapu le gagana Samoa.
O le iuga lea a le faamasinoga o loo sauni le vaega o tagata Samoa o le ekalesia i Brisbane e toe apili lea o loo avea ai le tamaitai loia o Leuluaialii Olinda Woodrooffe ma o latou sui e finauina. Peitai na saunoa Pelesetene Hamula o loo tatala le avanoa e feiloai atu ai i latou nei ia te ia pe afai e fia talanoa atili i le mataupu ona maua ai lea o so latou malamalamaaga.
Ua faaalia e le tamaitai loia o loo tauaveina le apili a ia sui o le ekalesia i se lipoti, ua sauni e faia lea tulaga peitai sa iai muamua se manaoga o lana vaega e feiloai i le alii pelesetene a o lei salalau le mataupu i auala o faasalalauga, ae sa lē talia.
Ua faaalia foi e le pelesetene o le a feiloai atu i le Palemia susuga Tuilaepa Sailele Malielegaoi pe a toe taliu i Samoa le taitai o le Malo mai fonotaga i fafo o loo auai, mo le faailoaina i ai o le finagalo o le ekalesia.
Ua viia ai e le pelesetene le manatu o le Palemia ma le Malo e taatia pea le mataupu e soalaupule e le ekalesia ma nisi o sui o loo aafia e maua ai se faaiuga. O lana faamatalaga o se finagalo sili lea ona sa‘o ma amiotonu.