… Ave e le tamaitai Samoa le “Tanoa o le Atamai” Laugatogi Kolisi Aranui
A aunoa le tama poo le teine aoga ma le loto tausinio aemaise le mafaufau tausinio, ona lē taunuu lea i manuia o le soifuaga.
Auā o le loto tausinio ma le filigā, atoa ma le tauivi e finafinau, o aseta malolosi ia e unaia le gaioi, galue ma le magafagafa.
O le loto tausinio foi e pulea le faapalapala, le paie, le fiu gofie ma le musua. A o ai se matua alofa e tuufau sana fanau ia iu i le ua falolo, ae amuia se matua ua oo i lona toe taimi ua na mautinoa ua Pale le fanau i Manuia.
O le faaiuga o le vaiaso ua tuanai na alo atu ai le kolisi maualuga Aranui i le latou laugatogi faaiu o le tausaga, ua faapitoa lea mo fanau Pasefika e pei ona masani ai tausaga taitasi, lea ua faaigoaina o le “Pasifika Fiafia Night Awards”.
Pau foi lea o le kolisi i le motu i Saute o loo a‘oa‘oina ai le gagana Samoa ma ua faapea ona ofi atu i le NCEA curriculum, ua molimauina foi le alualu i luma o le faamanuiaina o fanau e ala i le tapueina o le gagana Samoa, o se auivi aogā i lo latou ola a‘oa‘oina a o soifua ai i totonu o Niu Sila.
Na matuā faatumulia le hall a le a‘oga i mātua, o aiga, uo aemaise le valaaulia, ma na muamua le tatalo faafetai na saunia e Bishop Faafouina Kurene, ona faagasolo lea o le polokalame e le au faaiuaso o le kolisi (MC), Wikitoria Kurene ma le alii o Tusi Vaoga.
O lenei faamoemoe sa tuufaatasia e le komiti o faiaoga, Taufao Leota, Sia Batcheler, Andrew Auimatagi ma Seta Timo.
Sa auai foi i lea afiafi le mamalu o sui o le komiuniti, aemaise o le matagaluega o aoga, Fuetanoa Kose Seinafo ma Lealiiee Taleni.
Na matuā logo faa-Tutuila le aofia i lea afiafi i se molimau faamalosiau ‘anoa mai le tamaitai o Annabell Ariki (Guest speaker), o se alo Samoa sa avea ma taiulu o le kolisi i le tausaga 2008 .
E maoa‘e le faatupulaia o pasene o maka maualuluga o fanau i mataupu eseese, aemaise le musika, tusiga ata, taaloga ma le aganuu (Yr 9 – Yr 13), o se mitamitaga foi lea i le saunoaga a le alii pule o le kolisi, ae o se vine suamalie i mātua, auā foi e lololo ma suamalie le ola tauivi ua faamanuiaina.
O le taualuga o faailoga i lea po, ma le sili aoao na maua e le tamaitai o Wikitoria Kurene (Overall Pasifika Achiever), na tauaaoina lona faailoga “Tanoa o le Atamai”, faapea lana trophy e le fetalaiga Fuetanoa Seinafo, ae sola le alii o Tusi Vaoga ma le nifo ‘oti ma le pate i mataupu tau musika ma le Cultural Leadership.
O le alii o Maxie Duseigneur (Y12 Accounting) ua filifilia e avea ma taiulu o le kolisi i le 2011, ae manumalo Deborah Aulaumea i le ipu o taaloga (sports person) faapea le ipu o le “most academic junior” na maua e Tiperia Muaimalae.
O le susuga Lelevaga Laulu sa fai ma sui o mātua ma le valaaulia e momoli le faafetai i mātua o faiva auā le mamanuina o fanau e ala i le poto a‘oa‘oina i totonu o potu a‘oga, faaiu e Bishop Kurene i le tatalo ona alo atu lea i le taumafataga ma taape fiafia ina ua mae‘a ma le manuia le faamoemoe o le fanau.
E avatu ai le faamalo a le tatou nusipepa o le Samoa Times i alo ma fanau uma a le atunuu i soo se kolisi, e tusa ai ma galuega faaiu o lenei tausaga “Malo Finau, Malo Tau”.
