E tolusefulu le aumalaga o le aulakapi a le vasega o le Malu o le Malo poo leoleo a le Malo o Samoa o loo tapena nei e malaga i le taamilosaga lakapi a le malosi tau puipuiga poo le defense force a le lalolagi o loo galulue ai leoleo ma fitafita a Malo e pei o Niu Sila, Ausetalia, Peretania, Farani, ma Aferika i Saute. Faaalia e le komesina Lagolago le sui sooupu o le matagaluega o leoleo ma falepuipui afioga Leaupepe Lealaitagomoa Fatu Pula, o le taimi muamua lenei o le a masii ai se aulakapi a le matagaluega i se taamilosaga faavaomalo i le taaloga lakapi, ona o se valaaulia faapitoa.
E 12 atunuu o le a tausinio i lea taamilosaga e amata faagasolo i le faaiuga o le masina fou o Setema 2011, e pei ona fuafua o le aso 24 o le masina fou e tuua ai le atunuu. Faaalia e Leaupepe o le taimi nei o loo koleni le ‘au e ala i taaloga faasamasamanoa ma nisi o ‘au a kalapu lakapi i le atunuu, ae o le taaloga mulimuli a le ‘au masii le Western Force mai Ausetalia i le Aso Toonai na tea nei lea sa taaalo ai ma le ‘au sefululima filifilia a le Peresitene, sa faia ai se taaloga tala malae poo le curtain raiser i le va o le aulakapi a leoleo o le a malaga, ma le ‘au malosi a le kalapu lakapi a Vaiala.
O le Komesina o leoleo le afioga Lilomaiava Fou Taioalo o le a taitaia le faigamalaga e pei ona faailoa mai e Leaupepe Fatu Pula, ma o le a amata le taamilosaga i Ausetalia lea e faagasolo ai isi taaloga i le laumua o Ausetalia o Canberra, a o isi taaloga e faia i luga i Sini.
O taaloga ia o pool games o le a vaevae i ai ‘au e 12 lea o le a iai le ‘au mai Aferika i Saute, Peretania, Farani, Iapani Niu Sila ma Ausetalia ma isi atunuu e pei o Tonga ma Fiti.
E ta‘i 4 tausaga ma faia le taamilosaga a le malosi tau puipuiga a atunuu o le lalolagi, peitai o Samoa e ui ina leai sana vaega e faapitoa i le puipuiga o le matagaluega o leoleo ma falepuipui ua iai ma lea tiute tāua auā e leai se fitafita a lo tatou atunuu Malo.
O se mitamitaga o le pulega o le matagaluega o leoleo ma falepuipui ona o le a feiloai ai ma ‘au mai motu tuaoi o le Pasefika e pei o Fiti ma Tonga e iai a latou malosi tau puipuiga faafitafita i lea taamilosaga.
O le valaaulia o leoleo mai Samoa i le taamilosaga o se isi lea matatia ua ausia i le auaunaga faaleoleo i Samoa aemaise o le maualuga o le tulaga ole lakapi i lo tatou atunuu o le isi lea pogai o le aumai o le valaaulia mo le aulakapi a le Malu o le Malo.
O loo faia sailigatupe a le aulakapi a leoleo mo le faatupeina o se latou togiga fou, ae o pasese ma isi vaega o loo faatupe uma mai e le vaega o le tau puipuiga a le lalolagi o loo taulamua i le taamilosaga.
O le a fetaui tonu le faaiu ane o le taamilosaga i Niu Sila i le amataga o Oketopa ma le faagasolo ai o taaloga o le Ipu o le lalolagi i lea atunuu.
O le isi Ipu o le lalolagi i le isi fā tausaga o muamua o le a faato‘ā faia ai foi le taamilosaga lakapi a le malosi o le puipuiga a le lalolagi, lea o loo faamoemoe e toe auai ma le aulakapi a leoleo mai Samoa.
