O lenei lava polokalame ua toeitiiti atoa le tolu tausaga talu ona faagasolo e le Ofisa o Aoga ma le Ofisa o le Soifua Maloloina mo matua ina ia lelei le faafoeina o alo ma fanau aua ni lumanai lelei.
O le faamoemoega autu, ia faaauupegaina matua ini tomai e mafai ai ona latou gafataulimaina le tele o amioga a le fanau e avea ma popolega mo le lumanai. O le tele o suesuega, ua molimauina ai, o amioga a le tamaitiiti e mafua mai i le taimi o lona tuputupu ae i totonu o lona aiga i le siosiomiaga ma tagata e aofia i lo latou faafaileleina.
O se tasi o mau autu e faavae ai le taiala o aoga amata, o le atinaeina o le tamaitiiti atoa e aofia ai le atinaega o le tino maloloina, ola faaleagaga, fesootaiga ma isi – vafealoai, ma le mafaufau ina ia avea ma tagata aoaoina manuia. Afai e mautu ia vaega uma, o le a avea ma tagata malosi lona mafaufau e fetaiai ai ma faafitauli, ma e iai le tomai e fetuutuunai ai lona mafaufau ini ana faaiuga fai.
O le ala taua foi lea o nei polokalame oloo faagasolo nei e aunoa ma se totogi. O le tele o nai isi alo ma fanau, e faaalia ni amioga e le taliaina e le toatele, ma manatu ai o se tamaitiiti e leaga ma amio le taupulea. Peitai, e manatu se tasi fomai o le mafaufau, e iai le mafuaaga o amioga. Ma e mafua foi ona le lelei, ona e sese tagata oloo iai i le taimi e fai ai.
O le taimi nei, ua ofoina se polokalame faapitoa mo matua, e aoao ai matua ini tomai, e fesoasoani ai mo le sauni atu o le fanau mo le aoga.
O le faamoemoega autu, ina ia faaleleia avanoa mo fanau e ulufale ai i aoga tulagalua ua lava tapena ia latou amio, o uiga fiafia ina ia aoaoina, o le va fealoai ma isi, aemaise lava tomai e mafai ai ona galulue fiafia ma le faiaoga ma isi tamaiti. E tele lava se aoga o nei polokalame mo le faafaileleina o fanau.
O le tele o taimi e ave ai le faasea i nai fanau pe a faaletonu. Ae tatau foi ona tatou manatunatu, pe iai se mafuaaga. A lelei ona faafoe alo ma fanau mai le aiga, o le a mafai foi ona maua le lototele ma le onosai e fetaiai ai ma faafitauli, ma maua ai lo latou tomai, e faia ai ni faaiuga lelei.
Oloo faatinoina nei polokalame i le taeao ma le afiafi ina ia maua avanoa mo tagata uma. E manaomia lava le toatele o tagata Pasefika e aofia ai i lenei polokalame aua e fesoasoani tele mo le siitia o tulaga o aoaoga a le fanau.
