O le finagalo lea o le tamaitai o loo i le tofi Failautusi o le Sosaiete o Loia a Samoa, Rosella Papalii ina ua tāpā i se finagalo o le Sosaiete i le tele o mataupu ua tulai mai ua tuuaia ai loia o le atunuu. Faaalia e Papalii, e faigata tele ona fai mai se faamatalaga aloaia a le Sosaiete ona o le tele o mafuaaga.
O le mafuaaga muamua na ta‘ua e Papalii o le tele o mataupu nei ua laga ma ua ta‘ua ai loia, o loo faagasolo uma lava i le taimi lenei ma e lei mautu mai ni iuga ma seiloga ua mae‘a ia iloiloga ma faaiuga faapea suesuega ona faato‘ā mafai lea ona aloaia mai se tali a le Sosaiete.
“Ona pau le tulaga e mafai ona fai atu ai se tala, o loo faasolo pea galuega a le Sosaiete faatasi ai ma le Faamasinoga ona faato‘ā mautu lea o se tali e avatu,” o se saunoaga lea a Papalii.
O lea o loo tālia se tali a le Faamasinoga i se talosaga ua tuu atu mo le aveese lea o le susuga Semi Samau mai i le tuliina o lona faasalaga i le toese lea ua faamatuu mai i ai le sala e lima tausaga.
O le talosaga a le itu a lea alii loia, o loo maua i ni gasegase tuga le susuga i le alii loia ma o loo matuā moomia lava se taotoga i Niu Sila.
O se lipoti mai i le alii fomai o Satupaitea Viali o loo faaalia ai le manaomia o se taotoga o lenei alii ona o loo aafia lona fatu ma isi gasegase o totoga o le tino.
O lea la e tālia se finagalo o le Faamasinoga i lea talosaga ae o lea foi lava ua amata ona tuli le faasalaga o Samau i le toese i Tafaigata.
Ua faapea foi ona tālia le iuga o se isi foi alii loia i tuuaiga o le faia o uiga taufaasese. O le vaiaso nei e lau ai le iuga o lea alii ina ua mae‘a ona faamaonia le molaiga faasaga ia te ia.
O loo faagasolo lava foi le mataupu lea ua tele vaiaso o faalauiloa ai suafa o nisi o loia i le Sosaiete, talu ai fesuiaiga o fanua lea e ua lāgā ai ma le suafa o le faipule o Palauli i Sisifo le Tofa Toluono Feti Toluono lea na faataua ni fanua ua maua nei e lei tatau ona faatauina atu. E tusa ma le toalima loia o loo lāgā suafa i lenei mataupu.
O loo tālia foi poo afea e oo ai i luma o le Faamasinoga se isi foi mataupu ua maua e a tatou lipoti, o se alii loia ua tele tausaga o tautua i Samoa ae ua tuuaia e se tasi o tagata o loo galue ai lea loia, i le faaaogā o se seleni na teuina a lē ua faalauiloa ane sana faaseā i le mataupu.
O se teugatupe la ua tuuaia le loia i lona faaaogā mai ai o se seleni ae na ta‘ua e Rosella Papalii ina ua fesiligia pe ua oo atu lea mataupu, “E lē mafai ona fai mai se tala i lea mataupu”.
E lei toe iai lava se isi upu ua oo mai sei vaganā ai le faaaliga a le Failautusi o le Sosaiete, e mafai ona fai se faamatalaga i loia ua oo i luma o le Faamasinoga a latou mataupu, ae o le mataupu lea e lei oo i luma o le Faamasinoga e lē mafai ona talanoa mai i ai. E oo lava i le fesiligia e fai mai IOE pe LEAI na matuā leai lava se isi faamatalaga na mafai ona toe faailoa mai.Na faapea foi ona fesiligia i le mataupu o loo iloiloina nei e se komiti faapitoa a Loia lea o loo finauinia ai e le tamaitai Loia Leuluaialii Olinda Woodroffe se mau a le Sosaiete o Loia a Samoa faapea ua faia e Leuluaialii ni uiga ua lē talafeagai ona fai e se tasi e galue faaloia.
O finauga na faia mo aso e lua i Mulinuu ua toe tolopo nei ia Ianuari auā finauga faaiu poo folasaga mulimuli a itu e lua. O loo aofia ai la le Failautusi o le Sosaiete i le Vasega o Loia ia o loo fofogaina le mataupu lenei e faasino ia Leuluaialii.
O le tasi lava lea mafuaaga na ta‘ua e le Failautusi o le Sosaiete ua lē mafai ai ona fai mai se tala aloaia i le tulaga ua iai le toatele o loia ua aafia i luma o le Faamasinoga i le taimi nei.
“E lē fua tasi foi i ni galuega, ae e mafai ona ou faapea atu, o le tausaga aupito faigata ma le leaga lenei mo loia o le atunuu”, o se saunoaga lea a Rosella Papalii.
Seiloga la ua mae‘a uma iloiloga ma iuga o mataupu e pei ona ta‘ua, ona faato‘ā mafai loa lea ona aumai se faaaliga aloaia a le Sosaiete poo le ā foi sana galuega o le a faia e tali atu ai ia i latou ua tulai i luma o le Faamasinoga ona o solitulafono.
