Le Gaualofa o loo faaauvaaina e sui o le Aiga Folau o Samoa
O le malaga faaumiumi a le fuavaa lenei ua savalia le 15 masina o faagasolo e pei ona afea ai nisi o atunuu tetele o le lalolagi ma toe agai mai ai i le Pasefika lea ua afea ai ma Samoa i le taimi tonu e faamanatu ai le limasefulu tausaga o le Tutoatasi o Samoa.
O le afioga i le Ao o le Malo Tui Atua Tupua Tamasese Efi, o le faatamā lea o le Aiga Folau, ma o lana afioga o le a faafeiloaia le taunuu mai o le Gaualofa faatasi ai ma isi va’a e ono o le fua-va’a.
O Fepuari o le tausaga nei 2012 na tuua ai le atunuu e le Gaualofa faatasi ai ma vaa mai Niu Sila, le Atu Kuki, Fiti, ma Tahiti ma folau atu i Tonga, Niu Sila, le atu Kuki, Tahiti ma Hawaii ma afea ai Kalefonia i Amerika, o Mexico ma toe liliu mai ai. O le a faafeiloaia foi le taunuu ai o nei vaa e le peresitene o le aiga Folau le afioga Tuatagaloa Joe Annandale ma sui o le sosaiete o le aiga folau o Samoa.
Faaalia e le peresitene o se vaega tāua i tapenaga e faafeiloai ai le taunuu o vaa ona ua umi se taimi o malaga ese aemaise o le tāua o le latou savali o le faailoa o le puipuia lelei o le gataifale ma le siosiomaga.
O le tāua o taumafaiga a le aiga folau o Samoa ona o le toe faaolaolaina mai o auala sa faaaogā e matua ma tuaa i aso anamua e folau ai i le vasa loloa aemaise o ituaiga o vaa sa latou faaaogaina.
O se feau e molimoli i loto o fanau ma tupulaga talavou ia teu mau aua o se aoaoga mo i latou i le luamanai ma ia teu mau ai pea nei auala sa faaaogā i aso anamua e folau ai tagata o le Pasefika.
O le tasi lea o polokalame o le tutoatasi o le faatasi mai o vaa ma o latou auvaa i aso faamanatu o le tutoatasi.
O le a savavali le auvaa i le savali faaaloalo o le Tutoatasi a o lei toe tuua Samoa i le aso 2 o Iuni ma agai atu mo Fiti ma faaauau atu ai i Solomona mo le auai i le faaaliga tele o tu ma aganuu a le Pasefika o le a talimalo ai Solomona i le masina o Iulai.
O le auvaa o le Gaualofa o nisi o alo ma fanau a Samoa e aofia ai alii ma tamaitai. O le a faia se faaafe a le Malo o Samoa mo auvaa uma o nei vaa i le po o le Aso Lua, 29 o Me 2012.
O le Aso Lulu, 30 o Me o le a tatala ai le avanoa i le atunuu e latou te maimoaina luga o nei vaa, ma o se avanoa e silasila ai i fausaga o ia ituaiga o vaa ma nofoaga o loo faamautu ai auvaa taitasi.
