Atonu o le leva o le onosai o le alii Samoa ia Peter Betham i se avanoa e tatala malae ai i le Waratahs o le a avea nei ma laveai o Niu Sa Uelese. Na mataina le sikoa a Peter Betham i le taaloga ma le Cheetahs i le faaiuga o le vaiaso e ui na faia‘ina lana ‘au 26-27.
E le gata i lana sikoa lea na malosi mai ai lana momo‘e i lalo o le pou ma taupeupe mai ai Aferika e toalua, ae na lelei foi lana osofai muamua atu lea na sao mai ai ma pasi atu i fafo toe pasi atu loa mo ia le polo ae po i luma e la latou uigi ia Lachie Turner.
Ua faatoa vaaia ia Betham se uigi malosi a le Tahs e mafai ona toe faatusa atu ia Digby Ioane. Na tele ni avanoa o le Cheetahs e osofai atu ai lana pito aepeitai na lelei lana puipui.
Ua sosoo ai nei faia‘ina e tolu a le Waratahs talu ona amata le Supa 15 ma o se tulaga faanoanoa mo le faiaoga ia Michael Cheika. O le vaiaso muamua na lami a le Reds sosoo ai ma le Brumbies a o lenei ua manumalo ai foi Aferika e ui e tasi le ‘ai na malo ai 27-26. O le mea sili ona lelei ua maua ai le avanoa o Betham lea faatoa 24 tausaga, e tamoe ai ma faatilotilo le faiaoga ua tatau le tuu atu o lona faatuatuaga.
O lenei alo o le atunuu na soifua mai i Ueligitone Niu Sila ma sainia muamua e le Brumbies i le 2008 – 2007 ae lei maua lava se avanoa e taalo ai i le ‘au tele i lea tausaga. Na sosoo ai ma le sainia muamua e le Waratahs i le 2010 a o faiaoga Ewen Mackenzie ae peitai e lei faataaloa ai foi i lea tausaga.
O le 2011 na saini ai loa Betham e le Rebels a Melepone ma maua ai ana taaloga e valu(8) ma se ikoa e tasi. O le 2012 na toe amia ai loa e le Waratahs lea e oo mai ai i le taimi nei o tele lava i le vasega o le au faaleoleo.
E lua(2) taaloga a Peter i le tausaga talu ai ma o lana sikoa i le faaiuga o le vaiaso o le taimi muamua lea ua ia laasia ai le laina sikoa mo le Waratahs.
O lenei alii na taalo faatasi ma Kurtley Beale i le aufili a aoga Ausetalia i le 2006 a o aoga i le St Josephs College i Hunters Hill. Na malaga faatasi i laua i Fiti ma le aufili a tama aoga Ausetalia i lea tausaga. O se alii e pei o le fuaitino o Israel Folau ma le alii o Ben Volavola o le Waratahs, ma e aogā tele i polo maualuluga i taimi o taaloga. O le vaiaso nei ua toe filifilia ai Betham i le taaloga a le Waratahs lea atonu e toe atili faaiila ai lana uigi.