O ituaiga aso nei e lē oge upu ai Samoa. O le faauu mai o alo ma fanau ma ni faailoga maululuga e faatini i ai a latou tausinioga faaleaoaoga poo le taua o le mafaufau e pei o la isi, e masani ona vaaia ai loifofoga maligi o matua, uso, tuagane ma le aiga atoa.
E le o ni loifofoga o le faanoanoa ma le mafatia, ae o loifofoga o le olioli, le mitamita ma le faagaeetia.
O aso foi nei e lagona ai le siuleo, ‘Se ua malo fai o le faiva! Malo le faaea aiga! Malo le faaea atunuu! Malo le faaea ekalesia!
O upu ua talafeagai ona faamatala ai lagona faagaeetia o le tuaa o le tamaitai o Lucilla Brunt, le susuga Poloma Brunt e tusa o le toe faaeaina foi o lona alo i nisi faailoga faaopoopo e pei ona faauu mai ai i le Victoria University i le vaiaso talu ai. Sala ina faagaeetia le tamā, auā o ai ni mātua o le a lē mitamita i fua aliali o a la galuega fita ma le tele o ni faataulaga sa fai, ona o le faanaunauga ia iu manuia fanau?
I se isi lomiga a le Samoa Times i le masina o Aukuso o le tausaga nei lava, sa otooto atu ai nisi foi faailoga taualoa na ausia e Lucilla mai lea lava iunivesite, e pei o lona faailoga BA, (Majoring in Development Studies) faapea ma isi tulaga tau aoaoga, Education and Pacific Studies.
Sa manumalo foi i se faailoga ua faaigoaina o le Victoria Plus Award.
Ae o le vaiaso talu ai lea na faauu mai ai i isi ona faailoga sa faaauau ai ana aoaoga i le polokalame a le iunivesite e taua o le International Leadership Programme, faapea lona faailoga BA in Arts.
O le lomiga lena o Aukuso 31, o loo auiliili atu ai se vaega tele o le soifuaga o lenei tamaitai talavou. E tele ni atunuu ua mafai ona oo i ai Lucilla i le faatinoga o nisi o ona tiute ma galuega auā le faalauteleina o lona malamalama i ana aoaoga sa feagai ai.
Ona o le natura o ana aoaoga, ua mafai ai foi ona ausia e Lucilla se isi matatia iloga mo se alo o Samoa, e 6 ni gagana eseese ua tautala ma malamalama lelei ai, e pei o le gagana Samoa, Peretania, Korea, Potukale, Iapani, ma le gagana Tagalog a Filipaina. Peitai o loo moemiti pea lenei tamaitai, e fia tautala i ni gagana se 10 a o lei aulia le 30 tausaga o lona soifua.
E ui ua tele gagana ma aganuu ua malamalama ai, ae o le soifuaga atoa ma le agaga o Lucilla e pei ona molimau lona tuaa, e auga mai lava i lona tupuaga o se tamaitai Samoa.
O Lucilla e lona tolu i le faasologa o alo o le susuga Poloma Brunt mai afioaga o Vailima & Leufisa, ma le faletua ia Fiti Venu Brunt mai Faleula & Falealupo. Taua e Poloma, o le alafua lava lea e tasi o loo iai isi ona alo, i le agaga finafinau ma le filigā ia latou foi aoaoga.
E iai se tasi o uso moni o le susuga Poloma, le susuga Professor Peter Brunt, o ia foi o se tasi o alii Samoa na soifua ae i Niu Sila nei, o loo faiaoga i le Victoria University, ma na taua e Poloma, e telē se fesoasoani a lona uso, poo le uncle o Lucilla, i le uunaia o le agaga finafinau i aoaoga a ona alo, aemaise le tamaitai ua faauu nei.
