Ua atili faapine le mau o loo sapi ai pea tamaitai Samoa, ‘E au le Inailau a Tinā ma Tamaitai’.
A o lapelapea le suafa pele o Samoa i nisi lava o ana tamafanau talavou o loo aafia i solitulafono i itu eseese o le lalolagi aemaise i Niu Sila nei, ae ua lē mu itiiti ai le lagona tauivi ma le agaga saili malo ma le fia faaeaea atunuu, i nisi foi o ona alo ma tamafanau.
E pei la o le tamaitai o Lucilla Brunt, o se tamaitai talavou faatoa 24 tausaga o lona soifua, ae ua mafai ona ia ausia nisi o faailoga maualuluga i le tulaga tau aoaoga i totonu o Iunivesete, ma ua ia tauaaoina ai foi ni faailoga e tusa ma le tulaga sa taulai atu i ai lona taumafai.
O faamanuiaga ua ausia e Lucilla e tauala mai e le gata i nisi o avanoa sa ofoina ane e kamupani na lagolagoina lona taumafai, ae faapea foi i lona lava tauivi malosi sa ia finafinau ai.
Aiga & Tupuaga
E pei lava ona iai le muagagana faaperetania faapea, i tua atu o se tama o loo taulau manuia, o loo tu pe talitaliuli mai ai se avā galue malosi. E faapena le ata ua faatino mai e iuga manuia o taumafaiga a lenei alo o Samoa.
O le tamaitai o Lucilla, o se alo o le tamā o Poloma Brunt, mai le alaalafaga o Vailima ma Leufisa i Upolu, ae o lona tinā o Fiti Venu, e mai le afioaga o Faleula ma Falealupo i Savai.
E pei ona taua e Lucilla, e telē se aafiaga lelei o le tausiga a o latou matua ia i latou, i le faaletino ma faamalosiau mai ina ia faamaoni ma fai lelei a latou aoga, aemaise foi le tausiga lelei faalemafaufau i le faamanatu pea, ia faamuamua lo latou ola faaleagaga, ma ia ola i se uiga loto maulalo.
Taua e Lucilla, ‘o le auala lena sa faatulaga pe shape up ai lou olaga e ou matua, lea ua ou ola ae ai ma oo mai i ni taunuuga lelei i le asō.’
Na molimau Lucilla, o le vaai atu i le soifua finau ma le galulue malosi o o latou matua i le tausiga o i latou, o se uunaiga malosi lea na atili ai ona ola finafinau foi i latou iā latou aoaoga ma soo se mea latou te fai.
Sa faataua foi i o latou olaga le aoaoina o le gagana Samoa ma le agaifanua a le Samoa, ma e iai le talitonuga o Lucilla, o se isi lena pogai o lona ola ae e fiafia e aoaoina le tele o gagana, e aofia ai ma lana gagana Samoa, ae o lona sini, ia mafai ona ia tautala i ni gagana se 10 a o lei aulia le 30 o ona tausaga.
O le tamaitai o Lucilla Brunt ua mau paolo atu i se alii Filipaina o Jon Estoras ma ua iai foi si o la alo e toatasi lea ua 4 ona tausaga, le tamaitai laititi o Madia Brunt Estoras, lea e foliga o le a mulimulitui foi i tulagaao o lona tina, aua o Madia lea e na o le 4 ona tausaga, ae ua 3 gagana ua mafai ona tautala ai, le gagana Peretania, Samoa, ma se tasi o gagana a le atunuu o lona tamā i Filipaina, le Tagalog.
Aoaoga & Faailoga
O le tausaga nei, 2009 na faatoa faamaeaina ai i le Iunivesite a Victoria lona faailoga o le BA, (Majoring in Development Studies) faapea ai ma isi tulaga tau aoaoga, Education and Pacific Studies. Sa manumalo foi o ia i se faailoga ua faaigoaina o le Victoria Plus Award, ma o loo agai atu pea lona taumafai mo le faamaeaina o le polokalame o le Taitaiga poo le International Leadership Programme i le iunivesite lava a Victoria.
O ia avanoa sa ofoina ane e lea iunivesite ma amata mai ai aoaoga a Lucilla i le tausaga talu ai.
O le tausaga nei foi sa manumalo ai Lucilla i se avanoa faasikolasipi mai le Porirua City Council Youth Advisory Group.
Ua ia ausia ai foi se tasi o avanoa faasikolasipi e tāua tele, o le a avea ai o se tamaitai aoga i lalo o polokalame a le malo o Iapani, le JENESYS, Japan East Asia Network Exchange Students and Youths.
O le masina foi o Tesema i le tausaga talu ai, sa ia taitaia ai se aumalaga a tamaiti aoga mai Niu Sila sa malaga atu i Iapani ma toe foi mai mo le lua vaiaso.
O isi vaega faaopoopo i le soifua aoaoina o lenei alo o le atunuu e aofia ai le avea ma peresitene o le AFS (American Field Service) Pasefika, o lea polokalame e aofia ai ni atunuu e 52.
O le faamoemoe o lea polokalame o le sailia lea o avanoa mo tamaiti e auina i fafo atu o Niu Sila e aooga ai. Sa ia laasia foi le tulaga o le sikolasipi mo le tausaga e tasi i Brazil, ma o le auala lea sa ia aoaoina mai ai le gagana Potukale.
Galuega & Tofiga
O le taimi nei o loo ofoina atu le taimi o Lucilla e galue ai i se polokalame mo le aoaoina o le gagana Peretania poo le Igilisi mo i latou e fou mai i totonu o Niu Sila, aemaise i latou e sulufai mai i totonu o le atunuu ae matua leai se malamalama i le gagana Peretania.
O le isi vaega o loo ofoina atu ai le fesoasoani a lenei tamaitai, o le galue lea i le tusitusia ma faamaumauina mea o loo tutupu, i se polokalame faatusitala mo le Iunivesite a Victoria. Victoria International NZAID Newsletter, Victoria University Manaki Pihihinga, o se polokalame e silasila totoa ai ma maitauina galuega a tamaiti, iā latou suesuega i talaaga o le siosiomaga o atunuu eseese.
Ua ofoina foi lona taimi e fesoasoani ai i le nofoaga mo le aoaoina o gagana i totonu lava o le iunivesite, le Victoria University Language Learning Centre.
O lea nofoaga o loo aoaoina ai gagana eseese e pei o le gagana Peretania, Samoa ma le Potukale (Portuguese).
O lona faamanuiaina i le tele o ona agavaa eseese i le itu tau gagana, ua mafai ai foi e ia lava ona tautala i le gagana Perertania, Samoa, Potukale, Iapani, Korea ma le gagana Filipaina (Tagalog).
O loo faigaluega pea e oo mai i le taimi nei mo le Kiwi Bank e aunoa ma le totogi, o se tasi o ana ofo mo galuega lelei o loo fesoasoani ai.
