E ui ina itiiti Samoa, ua na o se togi faailo i luga o le faafanua o le lalolagi, ae iloagofie ma matilatila lona ata i taumafaiga a alo ma tamafanau Samoa soo se matātā. E finau, e talenia, e sogasogā, e iu manuia, e loto toa, e saili malo o le pale lea o loo e faaeaea ai lou atunuu i tulu‘iga e fā o le lalolagi e soo se tamafanau lava a Samoa. Malo fai o le faiva ma le lotonuu.
Atonu e lē fou le taaloga Softball, e lē fou le malaga taamilo o se au masii mai Samoa poo le ā lava le taaloga, e tauavea le igoa o le atunuu. Masalo foi e fou i lau faafofoga ma sau faitau le masii mai o se au Softball a alo ma tamafanau Samoa e auai i se taamilosaga faavaomalo faapenei i le taaloga Softball, ae peitai, e lē fou i lau maitau mai, iuga lelei o taumafaiga ma le faafiafia loto o se moemitiga pe a a‘e manuia se taumafaiga, ma lauiloa ai si o tatou atunuu i le lalolagi.
O le Tanifa Samoa, o le tatou aufili masii mai lea mai Samoa, o loo auai mai i le taamilosaga a le International Softball Federation Men’s World Softball Championship New Zealand 2013.
E lua vaiaso o loo faagasolo ai lenei taamilosaga, pei ona amata tatalaina i le aso 1 seia oo atu lava i le aso 10 o Mati, e lua vaiaso o loo faia ai i Rosedale Park i Albany.
Na amata tatala lava le taamilosaga i se solo tele a ‘au e 16 mai atunuu eseese o le lalolagi o loo auai i le faamoemoe, sosoo ai lea ma se saunoaga mai le minisita o atinae, Hon. Steven Joyce (Minister for Economic Developments), faapea ai ma le susuga i le Pulenuu o Aukilani, Len Brown.
O se taamilosaga finau ma foliga faigata, pe a faatusa atu i atunuu tetele nei o loo auai mai o latou sui i lenei faamoemoe. E lua POOLS ua vaevaeina i ai le taamilosaga, o le Pool A lea o loo iai le au a Samoa, ma le Pool B.
Pool A Pool B
Ausetalia Niu Sila
Amerika (USA) Kanata (Canada)
Venezuela Iapani
Peretania (Great Britain) Argentina
Czech Republic Phillipines
Aferika i Saute Mexico
Indonesia Colombia
Samoa Netherlands
O le au a le Tanifa Samoa ma le au Softball a Peretania (Great Britain) na tala malae, i le taaloga muamua o le taamilosaga, ma o le taaloga muamua foi a le tatou au. O le upu lava e masani ai, e laititi ae maini. Ina ua manumalo Samoa i lana uluai taaloga, Samoa 2 vs 0 Peretania. O se au malo foi le au a Peretania, ae ona ua pau lava e malosi lava le talo nai lo le pateta.
O le taaloga lona lua a Samoa, o le Aso Toonai i le faaiuga o le vaiaso, i le va lea o le Tanifa Samoa ma le au a Amerika, se taaloga mataina foi ma le finau, peitai na toe suipi foi Samoa ma manumalo ia Amerika i ‘ai e 3 i le 2 a Amerika.
E lē o tuumamaina lava e le feai o le Tanifa au tetele a isi atunuu. E leai foi se au e autamala i le taamilosaga, e finau uma lava mo le manumalo.
O le Aso Sa o le latou taaloga lona tolu lea o le taamilosaga, na fetaui ai ma le au a Indonesia, toe manumalo foi le Tanifa 11 vs 10 Indonesia, tolu sosoo lava le manumalo a le Tanifa i ana taaloga uma e tolu ua mae‘a, matagofie taumafaiga a si a tatou au.
O se tulaga lelei le finau ma le taalo malosi a lau au mai Samoa ma le faamoemoe ia faaauau pea le taalo malo mo ana taaloga o loo mulimuli mai i lenei vaiaso atoa. O le taaloga o le a sosoo ai a le Tanifa Samoa, o le taaloga i le va ma le au tele a Venzuela.
O se tasi nei o au malosi foi o le taamilosaga, e tolu ana taaloga ua mavae, leai foi se faiaina, manumalo uma i taaloga e tolu i le va ma au a Aferika, Peretania ma Czech Republic.
O le taaloga foi lea a Samoa, o le a finauina ai se avanoa e ofi atu ai i le quarter final o le taamilosaga. Talosia ia taaloga o totoe a le tatou au, ia manumalo mo lana taaloga faitaulia lea ma Venzuela ma sao ai mo se avanoa i le quarter final i le vaiaso nei.
O nisi nei o taaloga a le Tanifa Samoa mo lenei vaiaso:
Aso Gafua 4 Mati – Samoa vs Venzuela 6:30pm
Aso Lua 5 Mati – Samoa vs Czech Republic 1:30pm
Aso Lulu 6 Mati – Samoa vs Ausetalia 5:00pm
Aso Tofi 7 Mati – Samoa vs Aferika i Saute 2:30pm
Tuli tatao mai iuga ma le aotelega o taaloga Softball i le tatou pepa o le vaiaso fou,
poo ai se au o le a sola ma suipi i le siamupini o le taamilosaga a le International
Softball Federation Men’s World Softball Championship New Zealand 2013.
Ave le faamalo i nei alo ma tamafanau o le atunuu ua avea ma sui o Samoa taaloga faavaomalo tetele.
Ia manuia tele lau tapuaiga.
O le lisi o lea o le au Softball a le Tanifa Samoa ma ona ofisa:
Igoa – Alalafaga – Tulaga & #
Zne Siolo – Iva & Luatuanuu – Pitcher 17
Gregory Anderson – Faleasi’u – Pitcher 12
Thomas Enoka – Papaloloa – Pitcher 22
Joel Harris – Vaitoloa – Pitcher 18
Duane Jerard – Tanugamanono – Catcher 24
Kallan Compain – Papaloloa – Catcher 7
Gerard Long – Fasito’o Uta – Infield 23
Joshua Cooke – Apia – Infield 14
Aaron Knight – Saleufi – Infield 8
Gene Robinson – Malie, Malifa & Vaiala – Infield 2
Michael Niu (Capt) – Tanugamanono & Fasito’o Uta – Infield 21
Tony Niu – Tanugamanono & Fasito’o Uta – Infield 3
Bernard Hale – Afega – Outfield 16
Bradley Annandale – Sapapalii & Fasito’o Uta – Outfield 11
Joshua Niu – Tanugamanono & Fasito’o Uta – Outfield 19
Tristram Lupo-Samoa – Mulifanua – Outfield 15
Chris Kohlhase – Safotu – Coach
Rob Siolo – Iva & Luatuanu’u – Assistant Coach
Duncan Enoka – Papalolo – Assistant Coach
To’alepai Lui Tautolo – Tanugamanono & Fasito’o Uta – Liaison Officer
Rick Johnston – Lalovaea & Safotu – Manager
Edward Tanoi – Samatau & Laulii – Manager
Anita Gabriel – Vailima – Team Scorer
Noah Kohlhase – Safotu – Bat Boy
