Priscilla ma lona tina o Faamausili Nivana Gatoloai

Priscilla ma lona tina o Faamausili Nivana Gatoloai

O le tuputupu a’e o le olaga o le tamaitai talavou ia Priscilla Polly Lanuola Lavea Gatoloai i totonu o lona aiga i Moataa, na taoto ai se miti i lona loto e faapea, e fia laei i le laei a Samoa le malu a tamaitai. O le lagona o le tamaitai i lea taimi na te fia tauaveina le measina a le atunuu o loo laei ai nai ona mātua aemaise o uso o lona tina ma tuagane o lona tina o loo laei uma i le pe’a ma le malu a Samoa.

O le tamā o lona tina le afioga ia Tagaloa Matua Mulitalo Lavea Lisona Lavea o loo ia laeiina foi le pe’a a Samoa. Ma o foliga vaaia ia na faamausali ai i le loto o le tamaitai ia Priscilla Polly Lanuola Lavea Gatoloai e fia laei lava i le malu a tamaitai Samoa pe a matua. Alu a’i, alu a’i le soifuaga o le tamaitai ua tele lava ina fesilisili i lona tina ia Faamausili Nivana i le tāua o le malu o le tamaitai e ta i le tino.

Ma o le galuega matua lea a lona tina sa a’oa’o ai lona alo tamaitai, e faapea e mafua ona ta le malu a le tamaitai e iai ona ia matafaioi ma ona ia galuega fai i totonu o aiga nuu ma ekalesia, e faamalu ai aiga, e faamalu ai nuu e faamalu ai foi ekalesia, ae lē o le ta o le malu e tafao solo ai. Ae o le lagona ma le manaoga a lona tuaa le afioga ia Tagaloa Matua Mulitalo Lavea Lisona Lavea i lana fanau ma fanau a lana fanau, e tatau ona latou tauaveina le measina lea a le atunuu i totonu o le latou aiga e iloa ai le tagata Samoa moni i soo se mea e iai i le lalolagi.

O le malaga mai i Niu Sila nei o le susuga ia Papaliitele Toleafoa Laauli Gatoloai ma lona faletua ia Faamausili Nivana ma ona alo ma aumau ai e lei mafai ona aveesea ai i le loto o le tamaitai ia Priscilla Polly Lanuola Lavea lea lagona o loo tupu pea i totonu o lona loto. Ona ia talanoa lea i ona mātua o ia ua ia fia ta sana malu, ae o le fautuaga a ona mātua sa fai iai i lea taimi ia fai muamua lana Misiona mo le galuega a le Atua auā e iai lava le taimi ma le laolao e aumai e le Atua e tali ai lona manaoga, ma le isi vaega, ia ta muamua le gutu (tulou) ia iloa ona tautala ma fai tiute a le tamaitai Samoa ua laei i le measina a le atunuu.

Na usitaia e le tamaitai ia Priscilla Lanuola nei vaega uma na talanoa atu ai ona mātua, ma ua faaiuina ma le manuia lana Misiona i totonu o le ekalesia aemaise ai o le atamai ma le poto o le gutu o le tamaitai e tautala faaaloalo i le va ma tagata, faatasi ai o se tamaitai e matuā lelei tele lana tautala i le gagana Samoa.

Priscilla ma lona aiga, mātua ia Papaliitele Toleafoa Laauli Gatoloai ma Faamausili Nivana Gatoloai ma ona tei

Priscilla ma lona aiga, mātua ia Papaliitele Toleafoa Laauli Gatoloai ma Faamausili Nivana Gatoloai ma ona tei

O le aso 7 o Ianuari na faataunuuina ai loa le manaoga o le tamaitai ai Priscilla Polly Lanuola Lavea Gatoloai e ala lea i le taina o lana malu. E tasi le aso na faataunuuina ai lona faamoemoe i le maota o le afioga i le agaiotupu ia Tulouena Maleko i Flat Bush. O le tapuaiga a aiga na auai uma i lea aso aemaise ai o le nofo tatalo a mātua o lona tina ia Tagaloa Matua Mulitalo Lavea Lisona Lavea ma le tina ia Sooalo Lafaialii Faapale Lavea lea sa faaiuina ai ma le manuia le faamoemoe o le laua alo, ma samaina ai loa le malu a le tamaitai ia Priscilla Polly Lanuola Lavea Gatoloai i le afiafi.

O lagona fiafia o le tamaitai ia Pariscilla Lanuola Lavea Gatoloai ona ua faataunuuina ma le manuia lana moemitiga auā e moni lava e aumau i atunuu o palalagi ae lē faapea e ola faapalagi ai pea le tagata Samoa. O ia o le Samoa moni ma e fiafia tele lona olaga i le aganuu a Samoa faapea ma ana measina. O le fiafiaga foi lea i loto o tuaa o lona tina faapea nai ona mātua ia Papaliitele Toleafoa Laauli Gatoloai ma Faamausili Nivana Gatoloai ona o ia o le tamaititi muamua o fanau o fanau a mātua o lona tina o lea ua laei i le measina a Samoa le malu a tamaitai.

O le laei muamua ai o le tamaitai ia Priscilla Polly Lanuola Lavea Gatoloai i le laei a Samoa i fanau o fanau a le afioga ia Tagaloa Matua Mulitalo Lavea Lisona Lavea ma le tina ia Sooalo Lafaialii Faapale Lavea, ua tupu a’e ai i loto o isi ona tausoga faapea ona tuagane ua fia laei uma foi latou i le laei a Samoa le malu a tamaitai ma le pe’a a alii.